राजविराज : सप्तरीको छिन्नमस्ता गाउँपालिकामा मङ्गलबार साँझ एक नवजात शिशु वेवारिसे अवस्थामा फेला परेको छ।
छिन्नमस्ता गाउँपालिका-३ स्थित सखडा र गोविन्दपुर गाउँको बीचमा रहेको नहरको मुनी भर्खरै जन्मिएको शिशु जीवितै फेला परेको वडा अध्यक्ष दिपेन्द्रकुमार यादवले जानकारी दिए।
वेवारिसे अवस्थामा उक्त शिशुलाई स्थानीयवासीले देखेर खबर गरेपछि प्रहरी र जनप्रतिनिधि पुगेर उद्धार गरी स्वास्थ्य चौकी सखडामा उपचारका लागि भर्ना गराएका छन्।
नवजात शिशुको शरीरभरी रातो कमिलाहरुले टोकिरहेको अवस्थामा स्वास्थ्य चौकी ल्याइएको र प्राथमिक स्वास्थ्य जाँच र उपचार गरिएको स्वास्थ्य चौकी सखडाले जनाएको छ।
शिशुको स्वास्थ्य अवस्था सुधारोन्मुख भएको जानकारी दिँदै स्वास्थ्य चौकीका इन्चार्ज सिनियर अहेव अजयकुमार झाले थप उपचार र हेरविचारका लागि राजविराजस्थित गजेन्द्रनारायण सिंह अस्पताल लाने तयारी भइरहेको बताए ।
शिशुको आमा-बुवाको भने प्रहरीले खोजी गरिरहेको इलाका प्रहरी कार्यालय सखडाका सई विन्देश्वरप्रसाद यादवले बताए।
प्रतिक्रिया दिनुहोस !
