‘कोभिडसँग जोगिँदै दिनचर्या सुरु गरौं’
![‘कोभिडसँग जोगिँदै दिनचर्या सुरु गरौं’](https://annapurnapost.prixacdn.net/media/albums/news-photo_20201212103252_CG9uQFY0VW.jpg)
गुलरिया : लुम्बिनी प्रदेशका आन्तरिक मामिला तथा कानुनमन्त्री कुलप्रसाद केसीले कोभिड १९ ले समाजमा पारेको नकारात्मक असर अनुसन्धान गर्दै र जोगिँदै दिनचर्या सुरु गर्नुपर्ने बताएका छन् ।
बर्दियाको गुलरियास्थित जिल्ला प्रशासन कार्यालयमा आयोजित जिल्ला स्तरीय सुरक्षा गोष्ठीमा आएका मन्त्रीले कोभिडका कारण तिनै तहका सरकारको विकास निर्माणमा प्रभाव पारेको प्रष्ट पारे ।
कोभिडले रोकेका स्थानीय, प्रदेश सरकारका परियोजना कसरी सञ्चालन गर्ने सम्वन्धमा प्रदेश सरकारले अनुसन्धान गरिरहेको छ । कोभिडबाट सिर्जना भएको परिस्थितिमा जनलाई कसरी सहयोग उपलब्ध गराउन सकिन्छ भन्ने बारेमा छलफल भइरहेको छ । स्वास्थ्य महामारीका बेला सजग भएर दैनिक दिनचर्या सुरु गर्नुपर्नेमा उनले जोड दिए ।
बर्दिया जिल्ला जलसम्पदा, जैविकविविधता एवम् पर्यटकीय गन्तव्य सहितको उर्वरभूमी भएकाले यसको विकासमा प्रदेश सरकारले दीर्घकालिन विकासको अवधारणा बनाइरहेको बताए ।
कर्णाली र सुदूरपश्चिम प्रदेशलाई जोड्ने हुलाकी एवम् राजमार्ग दुवै बर्दियामा रहेकाले प्रदेश मुकाम नजिकिएपछि थप समृद्धिको मार्ग प्रशस्त हुने मन्त्री केसीको जिकिर छ ।
प्रदेशकै सुरक्षा व्यवस्था बलियो बनाउन जिल्लामा गरिएको गोष्ठी कोशेढुंगा सावित हुने बताए । लुम्बिनी प्रदेश अन्र्तगत आन्तरिक मामिला तथा कानुन मन्त्रालयको आयोजनामा बर्दियामा जिल्ला स्तरीय सुरक्षा गोष्ठी गरिएको छ । कार्यक्रममा बर्दियाका प्रमुख जिल्ला अधिकारी, प्रदेश मन्त्रालयका सचिव तथा उपसचिव लगायत सरोकारवालाहरु सहभागी थिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)