गुलरिया : महामारीका रुपमा फैलिरहेको कोरोना भाइरस (कोभिड–१९) सरकारले कमाइ खाने भाँडो बनाएको नेपाली कांग्रेसका केन्द्रीय सदस्य एवम् पूर्व भूमिसुधार मन्त्री डाक्टर गोपाल दहितले आरोप लगाएका छन् । नेपाली कांग्रेस बर्दियाले गुलरियास्थित राधाकृष्ण चोकमा आयोजना गरेको बृहत विरोध प्रर्दशन सभालाई सम्बोधन गर्दै नेता दहितले दुई तिहाइको सरकार कोरोना महामारी नियन्त्रणमा असफल भएको दाबी गरे ।
कोरोना महामारीका बेला सरकारले जनतालाई स्वास्थ्य उपचार, सुरक्षा एवम् राहत दिनुको साटो जनविरोधी काम गर्दै भ्रष्टाचारमा र्निलिप्त भएर कोरोनालाई कमाइ खाने भाँडो बनाएको उनको तर्क छ ।
संविधानले रक्षा गरेको स्वास्थ्य उपचार र खाद्य सम्प्रभुताको रक्षा गर्नुको साटो कोभिडका बिरामीको उपचार गर्न नसक्ने अभिव्यक्ति गैरजिम्मेवारीपूर्ण र्निलज्जताको पराकाष्ठा भएको उनको जिकिर छ ।
विगतमा नेपालले विश्वमा प्राप्त गरेका पहिचान दुई तिहाईको सरकारले गुमाउने काम गरेकोभन्दै नेपाली कांग्रेस भित्रको पूर्वाग्रह त्यागेर सरकारको गलत कामको विरुद्धमा लाग्न नेता दहितले कार्यकर्ताहरुलाई आग्रह गरेका छन् । नेपाली कांग्रेसले आन्दोलनको शुभमूहुर्त भैसकेकाले दुई तिहाईको दम्भ पालेर बसेको सरकार नसच्चिए गाउँगाउँबाट आन्दोलनको आँधिवेहरी श्रृजना हुने उनले चेतावनी दिए । 
प्रतिपक्षले आयोजना गरेका कार्यक्रमहरुमा धरपकट गर्नु सरकारको असफलताको चरित्र भएको बताए । भ्रष्टाचारी, जनविरोधी, नातावादी, निरंकुश प्रवृत्तिको नेकपा सरकारलाई सडकबाट खबरदारी गर्छौ । देशमा भएका हत्याहिंसा, बलात्कार, वेथितीलगायत किसान लगायत जनताका स्वास्थ्य समस्यालाई यथाशिघ्र सम्बोधन गरिनुपर्ने विरोध कार्यक्रमका सहभागीहरुको माग छ ।
नेपाली कांग्रेस जिल्ला कार्यसमिति बर्दियाको प्रांगणबाट निकालिएको विरोध र्याली गुलरिया बजार, जिल्ला प्रसासन कार्यालयहुँदै राधाकृष्ण चोकमा पुगेर कोणसभामा परिणत भएको हो । र्यालीका सहभागीहरुले कम्युनिष्ट सरकारको सर्वसत्तावादी प्रवृत्ति, कोभिड–१९ नियन्त्रणमा सरकारको असफलता, स्वास्थ्य सामाग्रीमा अनियमितता, भ्रष्टाचार, राज्य आतंक, चर्को मुल्यवृद्धि, महिला हिंसा, करबृद्धि लगायत कुशासनका विरुद्धमा नाराबाजी गरेका छन् । नेपाली कांग्रेस बर्दियाले आयोजना गरेको बृहत विरोध प्रर्दशन कार्यक्रममा जिल्लाका प्रशस्त नेता तथा कार्यकर्ताहरु सहभागी थिए ।
प्रतिक्रिया दिनुहोस !
