फिदिम : पाँचथरको हिलिहाङ गाँउपालिका ५ की ३० बर्षीया दुर्गा पुर्कुटी (उभरकोटी) को बुधबार राती ओछ्यानमै हत्या भएको छ। दुर्गाका श्रीमान धनबहादुर उभरकोटीले उनको हत्या गरेको हुनसक्ने प्रहरीको प्रारम्भिक अनुमान छ।
श्रीमतीको हत्यापछि फरार रहेका धनबहादुरलाई प्रहरीले खोजी गरिरहेको छ। ‘फरार हरेका धनबहादुरको खोजि भइरहेको छ’, जिल्ला प्रहरी कार्यालय पाँचथरका प्रहरी प्रमुख दानबहादुर थापाले भने, ‘थप अनुसन्धानपछि घटनाको बास्तबिकता खुल्नेछ।’ बन्चरो प्रयोग गरी दुर्गाको हत्या गरेको हुनसक्ने उनले बताए। दुर्गाको टाउकोमा चोट देखिएको छ।
सात दिन अघिमात्र धनबहादुर र दुर्गा आफ्ना बुवाआमाबाट छुट्टिएर अर्कै घरमा बस्न थालेका थिए। धनबहादुरले केही दिन यता अत्याधिक मादकपदार्थ सेवन गर्न थालेको स्थानीयको भनाइ छ।
प्रहरीका अनुसार बुधबार राती छोराबुहारी बस्दै आएको घरबाट मान्छे चिच्याएको आवाज आएपछि बुवा खड्गप्रसाद उभरकोटी हेर्न गएका थिए। बुहारीको हत्या भएको देखेपछि खड्गप्रसादले छिमेकीमा हारगुहार गरी प्रहरीलाई खबर गरेका थिए। घटनाको थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
