विराटनगर : नेकपा प्रचण्ड–नेपाल समूहको प्रदेश १ संसदीय दलको बैठकले दलका प्रमुख सचेतक बुद्धिकुमार राजभण्डारीलाई हटाउने निर्णय गरेको छ ।
आइतबार विराटनगरमा बसेको उक्त समूहको दलको बैठकले ओली समूहमा रहेका राजभण्डारीलाई हटाउँदै भण्डारीको काम सचेतक सौभाग्यवतीदेवी राई (किराँत)ले गर्ने निर्णय भएको सांसद बलबहादुर साम्सोहाङ्ले बताए ।
‘राजभण्डारी सचेतक थिए, जथाभावी कारवाही र स्पष्टिकरण गर्ने काममा मुख्यमन्त्रीको सारथी भएकाले आजको बैठकले हटाउने निर्णय गरेको हो,’ प्रचण्ड–नेपाल समुहमा रहेका सांसद साम्सोहाङले भने ।
यस्तै बैठकले प्रदेशसभा कार्यव्यवस्था समितिमा बुद्धिकुमार राजभण्डारी र इन्द्रमणी पराजुलीलाई हटाएर लिलाबल्लभ अधिकारी र उपेन्द्र घिमिरेलाई पठाउने निर्णय पनि गरेको छ । यो सँगै सबै समितिमा प्रचण्ड–नेपाल समुहले आफ्ना पक्षका सांसदलाई जिम्मेवारी दिएका छन् ।
सो समूहले संसदीय दलले संसदीय दल बोर्ड पनि गठन गरेको छ । बोर्डमा संसदीय दलका नेता भीम आचार्य, उपनेता टंक आङ्बुहाङ, सचेतक शौभाग्यवती राई, अन्य नेताहरु राजेन्द्र राई, धिरेन्द्र शर्मा (रमण), इन्द्रबहादुर आङ्बो (मौसम), जीवन घिमिरेलाई राखिएको छ । सो बोर्डको सदस्यसचिवमा तुलसी न्यौपाने रहेका छन् ।
बोर्डमा संसदीय दलका नेता, उपनेता र सचेतक पदेन सदस्य रहने प्रावधान अनुरुप छन् राखिएको र पार्टीका केन्द्रीय सदस्य र सांसदहरुमध्येबाट ११ जनालाई अन्य सदस्यको रुपमा छानिएको बताईएको छ । यस अघि दुबै समुह एक हुँदा समेत प्रदेश १ मा संसदीय दलको बोर्ड भने गठन थिएन । दल भित्रका कारवाही लगायतका महत्वपुर्ण निर्णय बोर्डले गर्ने प्रावधान अनुरुप उक्त समुहले बोर्ड समेत गठनमा सक्रियता देखाएको छ ।
उता ओली पक्षले भने दलको नेता मुख्यमन्त्री शेरधन राई र प्रमुख सचेतक बुद्धिकुमार राजभण्डारीनै रहेको र अर्को समुहले गरेको सबै कृयाकलाप पार्टीको विधान विपरित रहेको बताउँदै आएको छ । प्रदेश १ मा प्रचण्ड–नेपाल समुहका ३६ संसदले हस्ताक्षर गर्दै मुख्यमन्त्री विरुद्ध अविश्वासको प्रस्ताव प्रदेश सभा सचिवालयमा पेश गरेपछि दुई समुहबीच एकले अर्कालाई निषेध गर्ने र कारबाही गर्ने क्रम चल्न सुरु भएको हो ।
प्रतिक्रिया दिनुहोस !
