झापा : ‘राष्ट्रिय भक्का दिवस’ बुधबार झापामा भव्यताका साथ सम्पन्न भएको छ। कोच राजवंशी समुदायले पुस २९ गतेलाई भक्का दिवसका रूपमा मनाउँदै आएका छन्। कोचिला गाभुर फ्रन्ट सामाजिक संस्था केन्द्रीय समितिको आयोजनामा पुस २९ गते झापाको विर्तामोडमा सांस्कृतिक कार्यक्रमसहित ‘राष्ट्रिय भक्का दिवस’ सम्पन्न भएको हो।
उक्त कार्यक्रममा झापा लगायत, मोरङ, इलाम लगायतका छिमेकी जिल्लाबाट समेत भक्काको स्वाद चाख्न आउनेको पनि उत्तिकै उपस्थिति रहेको थियो। बिहान ८ बजेदेखि सुरु भएको उक्त कार्यक्रममा आयोजकले उपस्थित सबैलाई निशुल्क भक्का खाने व्यवस्था गरेको थियो।
राजबंशी समुदायको जातीय पहिरन पेटानी लगाएर भक्का बनाउन करिब १५ जना दिदी बहिनी बसेका थिए। भक्का सँगै माछाको तरकारी, भेन्टा र आलुको तरकारी र केराउ गोलभेँडाको पनि परिकार राखिएको थियो। आयोजकका अनुसार करिब ३ हजारको संख्यामा जनप्रतिनिधि, कर्मचारी, व्यावसायी लगायत अन्य सर्वसाधारणहरुको उपस्थित रहेको थियो। भक्का कोच राजवंशी समुदायले चिसो (हिउँदे) मौसममा खाने प्रमुख परिकार हो। पछिल्लो समय कोच राजवंशी समुदायसँगै अन्य जातजातिले पनि रुचाएपछि भक्का खाने प्रचलन बढेको छ।
राजवंशी जातिमा मात्र सीमित रहेको भक्का खाने चलन पछिल्लो समय सबै जातजातिबीच लोकप्रिय बनेपछि यसलाई प्रवर्द्धनात्मक कार्यक्रमसहित भक्का दिवस मनाउन थालिएको संस्थाका अध्यक्ष अभय राजवंशीले बताए। उनले भने, ‘विगतका वर्षभन्दा यो वर्ष भक्का प्रति चासो राख्नेको संख्यामा बृद्धि भएको छ। भक्का हेर्न र यसको स्वाद लिनकै लागि आउनेको संख्या पनि बढेको छ।’
झापामा भक्कालाई जाडोको मौसममा चोक–चोकमा खान पाइने एक सामान्य खाजाको रूपमा लिने गरे पनि भक्का स्वास्थ्यका लागि हितकर खाजा भएको अध्यक्ष राजवंशीले बताए। भक्का चामलको पिठोबाट बनाइन्छ। शुद्ध चामलको पिठोलाई पानीको बाफमा पकाएर भक्का बनाउने गरिन्छ।
पिठोको चामलमा कुनै वस्तु मिसावट नहुने तथा पानीको बाफमा मात्र पकाउने गरेकाले भक्का पूर्ण रुपमा स्वस्थकर छ। भक्का दिवस कार्यक्रममा कोच राजवंशी समुदायको परम्परागत विभिन्न स्वादमा भक्का खानुका साथै कोच लोक सांस्कृतिक कार्यक्रमको पनि प्रस्तुति रहेको थियो।
प्रतिक्रिया दिनुहोस !
