परासी: पश्चिम नवलपरासीको सरावल गाउँपालिका–५ धनगडवास्थित ३५ वर्षीया अनिता चौधरीले बुधबार राति विष खाएर २ छोरीलाई समेत विष खुवाएको प्रहरीको अनुसन्धानमा खुलेको छ ।
विष सेवनका कारण १२ वर्षीया छोरी नेहा, १० वर्षीया अर्की छोरी हेमा र अनिताको मृत्यु भएको जिल्ला प्रहरी कार्यालयका सूचना अधिकारी डिएसपी राजु लामाले जानकारी दिए ।
विष सेवनपछि पृथ्वीचन्द्र अस्पताल परासीमा पुर्याइएका उनीहरुको त्यहाँ उपचार हुन नसेपछि भैरहवा मेडिकल कलेजमा पठाइएको थियो । उपचारका क्रममा तीनै जनाको बिहीबार बिहान अस्पतालमा मृत्यु भएको डिएसपी लामाले जानकारी दिए ।
बुधबार राति करिब १० बजे घरको च्यानल गेटमा ताला लगाएर सबै जना कोठामा गएका थिए । कोठामा पुगेपछि अनिताले दुई छोरीलाई विष खुवाएपछि आफूले पनि खाएको प्रहरीको प्रारम्भिक अनुसन्धानमा खुलेको डिएसपी लामाले बताए ।
विष सेवन पश्चात घरभित्रबाट चिच्चाहट सनेुपछि स्थानीयहरु घरको छत हुँदै च्यानल गेटको ताला फोडेर कोठामा पुगेका थिए । स्थानीय पुग्दा तीनै जना कोठामा छट्पटाइरहेको प्रहरीले जनाएको छ । कोठामा दुई वटा चिया पिउने गिलासमा पानी जस्तो तरल पदार्थ देखिएकाले त्यसैमा विष राखेर छोरीहरुलाई दिएको हुनसक्ने प्रहरीले जनाएको छ ।
कोठामा मृतकहरुले बान्ता गर्ने क्रममा १०/१२ वटा विषका ट्याब्लेट देखिएका थिए । मृतक चौधरीका श्रीमान जितेन्द्र रोजगारीका लागि मलेसियामा छन् । चौधरीका सन्तानमा २ छोरी मात्र थिए ।
विदेशमा रहेका जितेन्द्रका बाबुआमा र अन्य दुई भाइ छन् । चौधरीले अंशवण्डा गर्न बाबुआमासँग माग गर्दैआएका थिए । अंश नदिएपछि ५ वर्षदेखि जितेन्द्र, श्रीमती र २ छोरी लिएर छुट्टै बस्दै आएको स्थानीयले बताए । बाबुआमा अन्य दुई छोराहरुसँग बस्दै आएका छन् ।
अंश नदिएपछि श्रीमानसँगकै सल्लाहमा अनिताले अदालतमा मुद्दा दिएर १२ कट्ठा जग्गा पाएको वडाध्यक्ष दिनेश सहानीले बताए । सोही जग्गामा जितेन्द्रले घर बनाएर परिवार राखेका थिए । अंश झगडाकै कारण भाइहरु र बाबुआमाको जितेन्द्रको घरमा आउजाउ छैन ।
‘विदेशमा रहेका जितेन्द्र मिलनसार र सोझा व्यक्ति हुन् । श्रीमती र छोरीहरुलाई राम्रैसँग हेर्दै आएका थिए । कसरी घटना भयो हामी पनि अचम्म छौं । ’ वडाध्यक्ष सहानीले भने ।
घटना हुनुभन्दा तीन दिनअघि मृतक अनिता र देवरबीच दिउँसो सामान्य भनाभन भएको स्थानीयले बताए । प्रहरीका अनुसार घटनाको प्रकृति हेर्दा मृतक चौधरी र उनका छोरीहरुलाई बाहिरबाट घरमा आएर कसैले विष खुवाएको आशंका गर्ने प्रमाण अहिलेसम्म भेटिएको छैन । अंशवण्डा वा अन्य तनाब के कारणले उक्त घटना भयो भन्नेबारे अनुसन्धान भइरहेको प्रहरीले जनाएको छ ।
प्रतिक्रिया दिनुहोस !
