ओखलढुंगा: भौतिक पूर्वाधार तथा यातायातमन्त्री वसन्तकुमार नेम्वाङले प्रधानमन्त्री तथा पार्टी अध्यक्ष केपी शर्मा ओलीलाई पुष्पलाललाई जस्तै गलहत्याउन खोजिएको आरोप लगाएका छन् ।
केपी ओली समूहको भेलालाई ओखलढुंगाको रामपुरमा सम्बोधन गर्दै मन्त्री नेम्वाङले निर्वाचित महासचिव पुष्पलाललाई जस्तै ओलीलाई हटाउने षड्यन्त्र गरेकाले संसद विघटन भएको जिकिर गरे ।
ओलीको नेतृत्वमा समृद्ध नेपाल सुखी नेपाली को नारा पूरा गर्ने अभियानलाई असहयोग गर्दै नेपाल प्रचण्ड समूह कुण्ठा पोख्न सडकमा पुगेको दावी गरे । उनले भने, ‘पार्टीमा समस्या आयो भनेर चिन्ता नलिनूहोस्, अलमल नगरिकन विकास र स्थिरताको पक्षमा आउनूहोस् ।’
ओली समूहले मोलुङ गाउँपालिकाको रामपुर बजारमा गरेको सभामा उनले स्थिर सरकार र विकासका लागि निर्वाचन आवश्यक भएको जिकिर गरे । गलत बिचार, प्रवृत्ति कुण्ठा र महत्वकांक्षाले कम्युनिस्ट आन्दोलनको नेतृत्व गर्न नसक्ने तर्क गरे । प्रचण्ड-माधव समूहप्रति लक्षित गर्दै उनले भने, 'पार्टी ठूलो भए पनि गलत बिचार, प्रवृत्ति कुण्ठाले आन्दोलन ध्वस्त हुन्छ ।’
मन्त्री नेम्वाङले आफ्नो कार्यकालमा ३० हजार किलोमिटर सडक स्तरोन्नति, ३ हजार किलोमिटर सडक कालोपत्रे भएको पनि दावी गरे ।
प्रतिक्रिया दिनुहोस !
