दाङ: दाङको तुलसीपुर कारागारमा रहेका कैदी बन्दीहरुलाई शुक्रबार कोरोना खोप लगाइएको छ ।
पहिलो चरणमा स्वास्थ्यकर्मी र सरसफाई कर्मचारीलाई खोप लगाउने नीति लिइएको भए पनि तुलसीपुरमा स्वास्थ्यकर्मी र सरसफाई कर्मचारीलाई लगाएर बचेको खोप कैदीबन्दीलाई लगाइएको हो ।
तुलसीपुर कारागारमा रहेका ४ सय ६० जना कैदीबन्दी र त्यहाँ खटिएका ७ जना सुरक्षाकर्मीहरुलाई खोप लगाइएको तुलसीपुर उपमहानगरपालिका कोरोना फोकल पर्सन जनस्वास्थ्य निरीक्षक विमल केसीले बताए । उनले एक सातापछि दोस्रो चरणको खोप लगाइने र सरकारले तोकेको मापदण्ड अनुसार दाङमा पनि खोप कार्यक्रम निरन्तर सञ्चालन हुने बताए ।
सल्यानका कैदीबन्दीलाई पनि खोप
सल्यानमा कारागार जीवन बिताइरहेका एक सय २२ जना कैदीबन्दीहरुलाई कोरोना खोप लगाइएको छ । स्वास्थ्य सेवा कार्यालय सल्यानको सहकार्यमा जिल्ला कारागारमा रहेका कैदीबन्दीहरुलाई कोरोना विरुद्धको खोप लगाइएको कारगार सल्यानका प्रमुख जेलर बल बहादुर केसीले जानकारी दिए ।
कारगारभित्र रहेका एक सय ५४ जनामध्ये एकसय २२ जना कैदीबन्दीले कोरोना खोप लगाएका हुन् । जसमा एकसय ३ जना पुरुष र १९ महिला र दुई कर्मचारीले पनि कोरोना खोप लगाएको कारागारले जनाएको छ । कारागारमा स्वास्थ्यकर्मीको दरबन्दी रिक्त हुँदा विगत एक वर्षदेखि नियमित स्वास्थ्य जाँच समेत गराउन नपाएका कैदीबन्दीले अहिले कारगार भित्रै कोरोनाको खोप लगाउन पाउँदा खुसी भएका छन् ।
सामान्य बिरामी पर्दा समेत जिल्ला अस्पताल वा प्राइभेट मेडिकलमा उपचार गर्नुपर्ने बाध्यता रहेका बेला कारगारभित्रै कोभिड विरुद्धको खोप लगाउन पाउँदा सबै कैदीबन्दीहरु हर्षित भएको चौकीदार हरि अधिकारीले बताए ।
हाल कारागारमा एकसय २२ जना पुरुष,२५ महिला र ७ नाबालक गरी जम्मा १ सय ५४ जना कैदीबन्दीहरु बस्दै आएका छन् ।
प्रतिक्रिया दिनुहोस !
