परासी : पश्चिम नवलपरासीको मदन आश्रित स्मृति भवनमा ओली पक्षले नेपाल कम्युनिष्ट पार्टी एमालेको बोर्ड राखेका छन् । भवनमा साविकको एमाले पार्टी कार्यालय हो । पार्टी एकीकरणपछि नेपाल कम्युनिष्ट पार्टी (नेकपा)को बोर्ड राखिएको थियो ।
सर्वोच्च अदालतले साविकको एमाले र माओवादी केन्द्रलाई ब्युँताएपछि उत्साहित भएका एमाले कार्यकर्ताहरु एमालेको पक्षमा नाराबाजी गर्दै बर्दघाटदेखि सुनवलहुँदै मोटरसाईकल र्याली निकालेर बोर्ड राख्न परासी पुगेका थिए ।
कार्यकर्तासँगै पुगेका लुम्बिनी प्रदेशका सभासद दिपेन्द्र अधिकारीले नेपाल कम्युनिष्ट पार्टी (नेकपा) को बोर्ड हटाएर एमालेको राखेका हुन् । कार्यक्रममा बर्दघाट नगरपालिकाका प्रमुख धीरज शर्मासहित युवा संघ र एमालेका कार्यकर्ताहरुको सहभागिता रहेको थियो ।
बोर्ड राख्दै सभासद अधिकारीले सर्वोच्च अदालतको फैसलापछि अब पुरानै पार्टी व्युँतिएकाले एमालेको बोर्ड राखेको बताए । पार्टीका उत्पन्न विवादसँगै नेताहरु दुई समुहमा विभाजन भएपछि ओली पक्षका कार्यकताहरुले यसअघि पार्टी कार्यालय आफ्नो भएको भन्दै तालाबन्दी गरेका थिए ।
प्रतिक्रिया दिनुहोस !
