झापा: झापाको कमल गाउँपालिका १ बालुबारीमा टिपरको ठक्करबाट शनिबार बिहान मोटरसाइकल चालकको मृत्यु भएको छ ।
केर्खाबाट निर्माण सामग्री लिएर हुलाकी राजमार्गतर्फ जाँदै गरेको ना १ क ६१६५ नम्बरको टिपरको ठक्करबाट शिवसताक्षी नगरपालिका ४ डाँडागाउँका २० वर्षीय सरोज कार्कीको घटनास्थलमै मृत्यु भएको जिल्ला प्रहरी कार्यालय झापाका प्रवक्ता प्रहरी नायव उपरीक्षक राकेश थापाले जानकारी दिएका छन् ।
कमल २ को क्याम्पा बजारतर्फ जाँदै गर्दा मे १ प ३७४७ नम्बरको मोटरसाइकलमा सवार कार्कीलाई टिपरले ठक्कर दिएको थापाले बताए । बिहानको घटनामा चालकले टिपर अगाडि बढाएर नियतवश् ठक्कर दिएर हत्या गरेको र मादक पदार्थ पनि सेवन गरी सवारी चलाएको भन्दै स्थानीय आन्दोलित बनेका छन् । उनीहरुले मृतकको शव उठाउन समेत दिएका छैनन् ।
टिपर हुलाकी राजमार्गको रतुवामाई कन्काई खण्डको सडक निर्माण गरिरहेको मोतीदान कन्स्ट्रक्सनको रहेको बुझिएको छ । प्रहरी घटनास्थलमा नपुग्दासम्म स्थानीयले चालकलाई घेरेरै राखेका थिए । अहिले प्रहरीले चालकलाई नियन्त्रणमा लिएको छ ।
स्थानीयबासीले चालकलाई हदैसम्म कारबाही, मृतकका परिवारलाई क्षतिपूर्ति र रोजगारीको व्यवस्थाको सहमती नगरेसम्म सडक खोल्न नदिने अडान लिएका छन् । स्थानीयका अवरोधका कारण हुलाकी सडकमा कुनै पनि सवारीका साधन चल्न सकेका छैनन् ।
प्रतिक्रिया दिनुहोस !
