बाघ बाँके निकुञ्जको उद्धार केन्द्रमा
![बाघ बाँके निकुञ्जको उद्धार केन्द्रमा](https://annapurnapost.prixacdn.net/media/albums/Geruwa-Tiger_20210318120906_5lLCt5DkoR.jpg)
गुलरिया : पछिल्लो समय बर्दियाको खाता जैविकमार्ग क्षेत्रमा मानवीय लगायत पशुधनको क्षति पुर्याउँदै आएको आदमखोर बाघ नियन्त्रणमा निइएको छ । बाघलाई बाँके राष्ट्रिय निकुञ्जको उद्धार केन्द्रमा पठाइएको छ । निकुञ्जको प्राविधिक टोलीले पाटेबाघलार्ई नियन्त्रणमा लिएको हो ।
आक्रामक बाघ नियन्त्रण गर्न विज्ञसहितको टोली संवेदनशील क्षेत्रमा परिचालन गरिएको बर्दिया राष्ट्रिय निकुञ्जका प्रमुख संरक्षण अधिकृत विष्णुप्रसाद श्रेष्ठले बताए ।
हामीले दुई दिनमा दुईवटा बाघ नियन्त्रणमा लिन सफल भएका छौं । खाता क्षेत्रमा नियन्त्रण गरिएको बाघ १० वर्षको छ । ‘पछिल्लो समय खाताक्षेत्रको घटनापछि राखिएको क्यामरामा पटकपटक परेको बाघ हामीले नियन्त्रणमा लिएका हौं’, उनले भने, ‘बर्दिया राष्ट्रिय निकुञ्जको उद्धार केन्द्रमा दुई वटा बाघ पहिले देखिनै छन् । ठाउँ अभावले खाताबाट नियन्त्रणमा लिएको बाघ बाँके राष्ट्रिय निकुञ्जको उद्धार केन्द्रमा पठाएका छौं ।’
बर्दियाको गेरुवा गाउँपालिका क्षेत्रको आक्रामक पाटे बाघ निकुञ्जले बुधवार नियन्त्रणमा लिएको थियो । विशेष प्रविधिबाट अनुगमन गरी पहिचान गरिएको बाघ सूई मार्फत लठ्याउने विधि (डार्ट) मार्फत नियन्त्रणमा लिइएको हो ।
बाघको पहिचान गर्न निकुञ्जले गेरुवा–कर्णाली नदी तटीय क्षेत्रमा अटोमेटिक क्यामरा जडान गरी आधा महिनादेखि अनुगमन गरेको उनले प्रष्ट्याए । गेरुवा क्षेत्रमा मानवीय तथा पशुधन क्षति गर्ने बाघ ११ वर्षको छ ।
यससँगै संवेदनशील क्षेत्रमा घटनामा कमी आउने निकुञ्जको विश्वास छ । जंगल क्षेत्रमा जथाभावी प्रवेश नगर्न संरक्षण अधिकृत श्रेष्ठले अनुरोध गरेका छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)