काठमाडौं : प्रधानमन्त्री केपी ओलीले देश अब आधुनिकतातर्फ अगाडि बढेको बताएका छन् । शुक्रबार साँझ प्रधानमन्त्रीको सरकारी निवास बालुवाटारमा उद्योगी व्यवसायीसँगको छलफलमा बोल्दै ओलीले यस्तो बताएका हुन् ।
‘हामी आधुनिकतातर्फ जाँदैछौँ’, प्रधानमन्त्री ओलीले भने, ‘इतिहास झल्कने, आधुनिकता टल्कने अभियानमा हामी छौँ ।’ यही अभियान अनुसार नै त्रिभुवन अन्तर्राष्ट्रिय विमानस्थलको सुधार भएको उनको भनाइ छ । ओलीले आधुनिकता टल्काउने नाममा इतिहासलाई भुल्न नसक्ने प्रष्ट पारे ।
‘हामी आधुनिकतातर्फ जाँदैछौँ तर हामी गौरवपूर्ण इतिहासलाई सम्झिएर परिवर्तनलाई कायम राख्दै अगाडि बढ्छौँ’, ओलीले भने, ‘हाम्रो काममा इतिहास पनि झल्किन्छ र विकास पनि अगाडि बढ्छ ।’ कोरोना संक्रमणका कारण नेपालको पर्यटन क्षेत्र समस्यामा परेको स्वीकार गर्दै ओलीले कोरोनाका कारण केही काम गर्न नसकेको बताए ।
उद्योगी व्यवसायीलाई राजनीतिक विषय सुनाउनु आवश्यक नभएको भन्दै ओलीले एद्योग र व्यवसायका क्षेत्रमा आफूले गरेका कामबारे जानकारी गराए । एमालेको एउटा समूहले राष्ट्रिय भेला गरेकोप्रति व्यङ्ग्य गर्दै ओलीले त्यो व्यवसायिका लागि सरोकारको विषय नै नभएको बताए ।
‘समृद्ध नेपाल सुखी नेपाली’ नाराका साथ सरकार अगाडि बढेको उनको भनाइ छ । उनले सुखसँगै सम्मानयुद्ध जीवन बाँच्न पाउनुपर्नेमा जोड दिए । नेपालमा माडवाडी समुदाय धनी भए पनि हेपिएको महसुस गरिराखेको भन्दै गुनासो आएपछि त्यसको जवाफमा भने, ‘हामी सुखसँगै सम्मानयुद्ध जीवन बाँच्न पाउनुपर्छ, मलाई लाग्छ उहाँले भन्नु भएको कुरा त्यही हो । त्यसैले त हामीले समृद्ध नेपाल सुखी नेपाली’ अभियान चलाएका हौँ ।’
ओलीले कृषि, उद्योग र सबै क्षेत्रमा समृद्ध नेपाल बनाउने चाहना रहेको प्रष्ट पारे ।
प्रतिक्रिया दिनुहोस !
