भोजपुर : ‘च्याङ्ग्रे’ भोजपुरको पुरानो हाटबजार लाग्ने ठाउँले परिचित थलो हो । च्याङ्ग्रेसँग जोडिएर आउने ‘च्याङ्ग्रेपोखरी’ पूर्वी पौवादुङ्मा गाउँपालिकाको मुटु हो । ऐतिहासिक धार्मिक महत्वको च्याङ्ग्रेपोखरी पछिल्लो समय पर्यटकीय गन्तव्य बन्न थालेको छ । पोखरीको प्राकृतिक मोहकताको आनन्द लिन जिल्लाबाहिर र भित्रका आन्तरिक पर्यटकको आगमन हुने गरेको छ ।
जिल्लाको प्रमुख ‘ट्रान्जिट प्वाइन्ट’ मानिने तिवारीभञ्ज्याङदेखि करिब ५ किलोमिटर दुरीमा च्याङ्ग्रेपोखरी पुगिन्छ । मध्यपहाडी लोकमार्गले जोड्ने भएकाले पनि पोखरी घुम्न आउने पर्यटकको आगमनमा बढेको हो । बाह्य पर्यटनलाई ध्यानमा राख्दै पोखरीको भौतिक पुर्वाधार निर्माणमा ठोस योजना बढाउन सके आयश्रोतमा टेवा पुग्ने स्थानीय रामजी राईले बताए । उनले पोखरीको विस्तृत योजनाका साथ संरक्षण र सम्बद्र्धनमा ध्यान दिए सरकारले पर्यटन प्रबद्र्धनको योजनामा सहयोग पुग्ने बताए ।
करिब १९ रोपनी क्षेत्रफलमा फैलिएको ऐतिहासिक धामिर्क महत्व बोकेको पोखरीको आफ्नै किम्बदन्ती छ । वर्षौअघि यहाँ च्याङ्ग्राहरु आएर पोखरीको पानी खाने, पानी खाएर पोखरीमै दिनभर आराम गर्ने भएकाले ‘च्याङ्ग्रे पोखरी’ नामाकरण गरिएको स्थानीय कथन छ । सृष्टिकालदेखी नै पोखरीको पानी जुनसुकै खडेरीमा पनि नसुक्ने स्थानीय ६४ वर्षीय निरबहादुर फुँयलको दावा छ । भन्छन्, ‘सानो छँदादेखी अहिलेसम्म पोखरीको पानी सुकेको छैन, केहि दैविक शक्ति छ जस्तो लाग्छ, यस्तो ऐतिहासिक पोखरीलाई संरक्षण गर्न सके राम्रो हुन्थ्यो’
पोखरीको बीच भागमा रहेको पञ्चकन्या मन्दिरमा धार्मिक भक्तालुहरु पूजाआजा गर्ने गरेका छन् । मन्दिरसँगै जोडिएकाले पोखरीलाई पवित्र धार्मिक थलो मानिन्छ । हरेक वर्षको बालाचर्तुदशी, शिवरात्री, रामनवमीका बेला बाहिरबाट आउने भक्तालुको ठूलो भीड लाग्ने गरेको स्थानीय हर्क फुँयलले बताए ।
पोखरीको सौन्दर्यतामा रमाउने पर्यटकको आगमन वृद्धि भएसँगै च्याङ्ग्रेबजारका होटल व्यावसाय पनि फस्टाएको छ । होटल लज र पसल खोलिने क्रम छ । पोखरीलाई पर्यटकीय गन्तव्यको रुपमा विकास गरिनुपर्ने स्थानीयबासी बताउँछन् ।
ऐतिहासिक र धार्मिक महत्वको पोखरीको भौतिक पूर्वाधार निर्माण र प्रचारप्रसार गर्नसके गाउँपालिकाको आर्थिक उन्नतीमा टेवा पुग्ने स्थानीय ज्ञानेन्द्र राई बताउँछन् । पोखरीको मोहकता र लोकप्रियता बढेपछि स्थानीयको पनि आयश्रोतका विकल्पहरुको बाटो खुलाउन मद्दत पुग्ने उनले बताए ।
पोखरीको प्रबद्र्धन गर्न गाउँपालिकाले डिपीआरसहितको योजना अघि बढाएको छ । पोखरीको पर्खाल उठाउने, आसपासका बस्तीलाई मुआब्जा दिएर अन्यत्र सार्ने, कुलो र ढल निकास गर्ने, पानी शुद्धता गर्ने, मन्दिरको संरक्षण गर्ने योजना अघि बढेको छ । गाउँपालिका अध्यक्ष किरण राईले पोखरीलाई आकर्षण थपेर बाह्य पर्यटक भित्राउने लक्ष्यले योजना अघि बढाईएको बताए । ‘गाउँपालिकाकै मुटु रहेको च्याङ्ग्रे पोखरीलाई व्यवस्थित गर्ने योजनामा जुटेका छौँ, पोखरीलाई पर्यटकीय थलो बनाएर गाउँपालिकाको आयश्रोत भित्राउने लक्ष्य हो,’ उनले भने ।
कोभिड १९ का कारण भ्रमण वर्ष २०२० बन्द हुनुले पर्यटनमा निकै खलल पुगेको गाउँपालिकाले बताएको छ । भ्रमण वर्षलाई सफल पार्दै आन्तरिक तथा बाह्य पर्यटक भित्राउने लक्ष्य लिएपनि कोरोनाभाइरसका कारण गाउँपालिकाको तयारी समेत रोकिएको गाउँपालिकाकी उपप्रमुख सम्झना राईले सुनाइन् ।
प्रतिक्रिया दिनुहोस !
