सिरहा : एक समूहले शनिबार मध्यरात लहान नगरपालिका–२३ गढिया चोकस्थित अमिता ज्वेलर्सका प्रोप्राइटर प्रदीप विश्वकर्माको गोली हानी हत्या गरेको छ । सुनचाँदी व्यवसायी विश्वकर्मा बस्ने कोठामा रहेका सुनचाँदी र नगद लुटेराले लुटेका छन् ।
पसलमा भने तोडफोड गरेका छैनन् । उनकी पत्नी अमिता रुचाल डाका समूहको आक्रमणबाट घाइते भएका छन् । विश्वकर्मा परिवारसहित वडाध्यक्ष कन्हैया गुप्ताको घरमा डेरा गरी पसल गर्थे । अपराधीहरू घर पछाडीबाट छिर्न थालेपछि बुवाले स्थानीयसँग गुहार मागेको १५ वर्षीय प्रेम रुचालले बताए । ‘बुवाले एक–दुई जनालाई फोन गर्नुभयो । तबसम्म डाकाहरू घरको कम्पाउन्डमा आइसकेका थिए । ढोका फोडेर भित्र छिरेपछि बुवाआमालाई कुटपिट गर्न थाले । हामी खाटमुनि लुक्यौं’, प्रेमले भने, ‘स्थानीयहरू घरबाहिर आएर होहल्ला गरेपछि डाकाहरू धरिलो हतियार र गोली प्रहार गरेर भागे ।’
टाउको, अनुहार र हातमा खुकुरी प्रहार र छातीमा गोली लागी घाइते भएका विश्वकर्माको आइतबार सप्तऋषि अस्पतालमा उपचारका क्रममा मुत्यु भएको हो ।
डड्यांग डुंग आवाज सुनेपछि आफू ब्युँझिएको छिमेकी तेजनारायण ठाकुरले सुनाए । डकैती भइरहेको बुझेपछि आफुले विश्वकर्मा बस्ने घरका मालिक वडाध्यक्ष गुप्तालाई फोन गरेको उनले बताए । गुप्ताले प्रहरीलाई खबर गरेपछि प्रहरी टोली ३५ मिनेटपछि घटना स्थल पुगेको थियो । ‘समयमा प्रदीपको गुहार स्थानीयले सुनिदिएको भए ज्यान बच्ने थियो’, उनले भने ।
सिरहाका एसपी सुदीपराज भण्डारीले उक्त घटनामा संलग्न रहेको आशंकामा लहान नगरपालिका–७ का रामकृष्ण चौधरी र लहान नगरपालिका–२३ का सूर्य सहनीलाई फलामको छिनोसहित नियन्त्रणमा लिएर अनुसन्धान गरिरहेको बताए ।
प्रतिक्रिया दिनुहोस !
