इटहरी : चैत ५ गते खोलामा डुबेको अवस्थामा मोरङको सुन्दरहरैंचा–५ का सुरज चौधरीको शव तेलिया खोलामा भेटियो । २५ वर्षीय उनको स्वाभाविक मृत्यु नभएर हत्या भएको आफन्तको गुनासो छ ।
घटनामा न्याय दिलाउनुको साटो स्थानीय जनप्रतिनिधि र प्रहरी प्रशासनले मिल्न दबाब दिएका उनीहरूको भनाइ छ । घटना भएको अघिल्लो रात सुरज स्थानीय राजेश चौधरीको मोटरसाइकलमा हिँडेका थिए ।
खोलामाथिको पुलमा राजेशले चलाउने को ३७ प ७४४५ नम्बरको मोटरसाइकल लडेको अवस्थामा भेटिएको थियो । ‘राति साढे एघार बजे राजेशले घरबाट दाइलाई लिएर गएको थियो,’ सुरजकी बहिनी सविना चौधरीले भनिन्, ‘भोलिपल्ट बिहानै दाइको लास खोलामा भेटियो ।’
सुरज र राजेश मिल्ने साथी थिए । केही महिनाअघि मात्र राजेश वैदेशिक रोजगारबाट फर्किएका थिए । घटनापछि बेपत्ता राजेशलाई दुई दिनपछि प्रहरीले फेला पारेको थियो । बेलबारीका प्रहरी निरीक्षक ऋषिराज ढकालका अनुसार लाइसेन्स नभएको अवस्थामा दुर्घटना भएपछि राजेश डराएर भागेका थिए ।
घटना भएको अघिल्लो रात राजेशले सुरजलाई घरबाट लानु, पुलमाथि मोटरसाइकल र खोलामा लास भेटिएपछि नियोजित रूपमा हत्या भएको हुन सक्ने आफन्तको भनाइ छ ।
घटनाको अनुसन्धानको लागि प्रहरीले राजेशलाई पक्राउ गरे पनि सबैतिरबाट मिल्न दबाब आएको सुरजकी श्रीमती उषा चौधरीले बताइन् । ‘गाउँलेदेखि प्रहरी सबैले मिल्नु, उनीहरू धनी मान्छे हो, छुटिहाल्छ भन्छन्,’ उनले भनिन्, ‘नियमले ८ लाख पाइन्छ भनेर भनेको छ ।’
प्रहरी निरीक्षक ढकालले भने घटना हत्या नदेखिएको दाबी गरे । दुर्घटना मुद्दामा अनुसन्धान भइरहेको र परिवारले ज्यानमुद्दा पनि नहालेको उनले बताए । ‘सवारी ज्यान मुद्दाअनुसार पाउनुपर्ने क्षतिपूर्ति उहाँहरूले पाउने कु्रा हुन्छ,’ ढकालले भने, ‘पछि हत्या ठहरिएन भने त्यो पनि पाउनुहुन्न ।’
प्रतिक्रिया दिनुहोस !
