उदयपुर : जिर्ण सिद्धिचरण लोकमार्ग स्तरोन्नतिमा सम्बन्धित निकायले ध्यान नदिएको भन्दै स्थानीयले सोमबार बिहानैदेखि सडक अवरुद्ध गरेका छन्। सडक अवरुद्ध सँगै माथिल्लो सगरमाथाअन्तरगत ओखलढुंगा, सोलु र खोटाङ्गका लागि छुटेका सवारी साधन अलपत्र छन्।
सिराहा–उदयपुर–ओखलढुंगा जोड्ने लोकमार्गको स्तरोन्नति माग गर्दै आएका स्थानीय उपभोक्ता संघर्ष समितिले सरकार र डिभिजन सडक कार्यालय लाहानलाई ज्ञापनपत्र बुझाउँदा समेत वेवास्ता गरेको भन्दै आन्दोलित भएका हु्न्।
सिरहाको मिर्चैयादेखि उदयपुरको कटारी हुँदै ओखलढुंगा सीमास्थल घुर्मीसम्मको सडक खण्ड तत्काल स्तरोन्नति गर्न उनीहरुको माग छ। उक्त खण्डको सडक जिर्ण भएकाले बारम्बार दुर्घटना हुँदा पनि दीगो मर्मतसम्भार नगर्दा यात्रु, यातायात व्यवसायी र स्थानीयलाई वर्षौंदेखि समस्या भोग्नुपरेको संर्घष समितिका संयोजक दिपक बुढाथोकीले बताए।
पटकपटक स्तरोन्नतिको माग स्थानीयले गरे पनि सम्बन्धित पक्षले कुनै चासो नदिएपछि बाध्य भएर आन्दोलना उत्रिनु परेको उनले बताए। कटारी नगरपालिका ११ का वडाध्यक्षसमेत रहेका बुढाक्षेत्रीका अनुसार सडक मर्मत कार्य तत्काल सुरु गर्न गरिएको माग वेवास्ता गरियो।
उनले भने, ‘हामीले बारम्बार सडक स्तरोन्नतिको माग गर्दै आएका छौं तर, सम्बन्धित निकायले कान थुनेर, आँखामा पट्टी बाँधेर बस्यो।’ संघर्ष समितिले आर्थिक वर्ष २०७८-०७९ को बजेटमा लोकमार्ग सुरक्षित आउजाउ गर्न यसअघिदेखि उठाउँदै आएको दुई लाईन सडक बनाउनुपर्ने मागलाई कार्यान्वयन गर्न पर्याप्त बजेट बिनियोजन गर्न, त्यसको लागत ईस्टीमेट बनाएर काम थाल्ने सुनिश्चित गर्नुपर्ने माग राखेको छ।
दुई लाइन सडक बन्ने निश्चित नभएसम्म आउजाउलाई सहज बनाउनका लागि तत्काल मर्मत गर्न स्काभेटर, जेसिबीजस्ता उपकरण तैनाथ राख्न तथा सडकमा धुलो मार्न पानी छ्याप्ने ट्यांकर तैनाथ गर्न पनि माग गरेको छ। सिद्धिचरण लोकमार्गको कटारी नगरक्षेत्रमा पर्ने कटारीदेखि घुर्मीसम्म ४६ किलोमिटर सडक जीर्ण भएकाले सवारी आउजाउ समस्या पर्दै आएको कटारी नगरपालिकाका मेयर ज्ञानेन्द्र श्रेष्ठले बताए।
उनले सडक समस्याका बारेमा प्रधानमन्त्री, अर्थमन्त्री, भौतिक पुर्वाधार मन्त्री लगायत सरोकारवाला निकायको ध्यानाकर्षण गराएको र चाँडै सम्बोधन हुने आश्वसन पाएको बताए। उनले केहि वजेट चालु आर्थिक वर्षमै खर्च गर्ने गरी आएकोसमेत बताए। कटारीका वडा नम्वर ८, ९, १०, ११, १३ र १४ ले छोएको उक्त खण्डको सडक स्तरोन्नतिको माग गर्दै धेरै पटक स्थानीयले सडक कार्यालय, नगरपालिका, सडक डिभिजन हुँदै मन्त्रालयको ध्यानाकर्षण गराइसकेका छन्। दिनरात हजारको संख्यामा बढी भारक्षमताका टिपर चल्ने भएकाले वर्षेनी मर्मत गरे पनि ३ महिनाभित्रै बिग्रेर जस्ताको तस्तै हुने गरेकोले सडकको दिगोपनाको खोजी भइरहेको उपमेयर भिमकुमारी राउतले बताइन्।
सिराहाको चन्द्रोदयपुरस्थित मारुती सिमेन्टका लागि सिन्धुलीको ककरुठाकुरदेखि ओसार्ने चुनढुंगा बोक्ने टिपर यही लोकमार्ग भएर आउजाउ गर्नाले सडकको यो हालत भएको उनको भनाइ छ। पछिल्लो दुई वर्षयता सौर्य र कसमस सिमेन्ट उद्योगका लागि कटारीकै पट्नाभन्ज्याङलगायत दुई ठाउँको चुनढुंगा ओसार्ने रुट पनि यही भएकाले सडकमा थप भार पर्दै आएकाले बैकल्पिक सडक चाहिने उपमेयर राउतले बताइन्।
मिर्चयादेखि कटारी घुर्मी हुँदै ओखलढुंगा, सोलुखुम्बुसम्म जोड्ने उक्त सडक नेपाली सेनाले ०५८ सालमा अस्फाल्ट प्रविधिको कालोपत्रेसहित निर्माण गरेको थियो। पुरानो प्रविधि, मेसिन उपकरणको अभावले जनशक्तिकै भरमा कोदालो र झम्पलको भरमा खनिएको उक्त सडक पहाडी भेग भएकाले घुम्ती र साँघुरो पनि छ।
एक दशकसम्म कालोपत्रे टिके पनि चुनढुंगा बोक्ने टिपर दिनहुँ चल्न थालेपछि वर्षदिनमै कालोपत्रे उप्किएर सडक धुलाम्य र खाल्डैखाल्डामा परिणत भएको छ। त्यसयता सडकको मर्मत कार्य वर्षेनी हुँदै आए पनि ३–४ महिनामै बिग्रेर जस्ताकोतस्तै हुने गरेकोछ। कटारी र माथिल्लो सगरमाथाको ‘लाईफलाईन’ मानिएको उक्त लोकमार्गको दीगो मर्मत गर्न सकेमा दक्षिणीभेगका पर्यटक तथा तीर्थालुलाई खोटाङको त्रिधार्मिकस्थल हलेसी आउजाउ गर्न सजिलो पर्ने मेयर श्रेष्ठ बताउँछन्। साँघुरो र घुम्ती सडकमा हजारौं संख्याका सवारीसाधन चलाउन टिफरका लागि अलग्गै सडक बनाउन गरेको स्थानीयको माग जायज भएको उनको भनाइ छ।
प्रतिक्रिया दिनुहोस !
