भोजपुर : सगरमाथा युथक्लब मोरङलाई हराउँदै आयोजक टिम भोजपुर चौथो अन्र्तराष्ट्रिय आमन्त्रण मेयर भोजपुर गोल्डकप फुटबल प्रतियोगिताको सेमिफाइनलमा प्रवेश गरेको छ ।
सोमबार सम्पन्न दोश्रो खेलमामोरङलाई ४–० गोल अन्तरले हराउँदै भोजपुरले सेमिफाइनलमा पुगेको हो । खेलको पहिलो हाफको १७औँ मिनेटमा निशान लिम्बूको गोलबाट भोजपुरले सुरुवाति अग्रता लिएको थियो ।
त्यसको १ मिनेट वित्न नपाउँदै भोजपुर विजय भुजेलले अर्को गोल थप्दै टिमको अग्रता दोब्बर बनाएका थिए । लगातार गोल हुने क्रममा सुवास तामाङले टोलीका लागि तेश्रो गोल थपे ।
पहिलो हाफसम्म ३–० को अग्रता बनाएको भोजपुरले दोश्रो हाफको १६ औँ मिनेटमा निशान लिम्बूले दोश्रो गोल गर्दै टिमलाई ४–० गोलअन्तरको अग्रता दिलाए । केही सुन्दर गोल गर्ने अवसर पाएपनि मोरङले गोल गर्न नसकेपछि खेलको नतिजा भोजपुरको पक्षमा गयो । योसँगै मोरङ प्रतियोगिताबाट बाहिरिएको छ ।
यसअघि आइतबार सम्पन्न क्वार्टर फाइनलमा धरानलाई हराउँदै भगवती स्पोर्टस् क्लब खोटाङ सेमिफाइनल प्रवेश गरिसकेको छ ।प्रतियोगिताअन्र्तगत मंगलबार धनकुटा फुटबल क्लब धनकुटा र अफ्रिकन रुट्स एशोसियसन (क्यामरुन) बीच प्रतिस्पर्धा हुनेछ । उक्तप्रतियोगिता ११ गते सम्पन्न हुने आयोजकले जनाएको छ ।
प्रतिक्रिया दिनुहोस !
