उदयपुर : उदयपुरमा ६ जना कोरोना संक्रमित थपिएका छन् । जिल्ला स्वास्थ्य कार्यालयका प्रमुख मोहन सुवेदीका अनुसार बिहीबार चारजना एन्टिजेन टेष्टबाट र दुई जना पीसीआर परीक्षणबाट जाँच गर्दा संक्रमण पुष्टि भएको हो ।
बिहीबार दिउँसो कार्यालय परिसरमा एन्टिजेन विधिबाट ११ जनाको परीक्षण गर्दा रौतामाई गाउँपालिका ५ का ६८ वर्षीय पुरुष, त्रियुगा नगरपालिका ८ का ३३वर्षीय पुरुष र त्रिनपा ६ का २६ र २८ वर्षीया महिलामा कोरोना संक्रमण देखिएको उनले बताए ।
त्यसैगरी पाँचजनाको पीसीआर प्रविधिबाट परीक्षण गर्दा दुईजनालाई संक्रमण पुष्टि भएको हो । योसँगै जिल्लामा दोस्रोचरणको कोराना भाइरसको लहरबाट संक्रमित हुनेको संख्या २० पुगेको छ । त्यसैगरी कोरोनाबाट एक महिलाको मृत्यु भइसकेको छ ।
यसैबीचमा दुईजनाले कोरोना जितेर घर फर्किएका छन् । प्रमुख जिल्ला अधिकारी तुलसीराम सेढाइका अनुसार हालसम्म सक्रिय संक्रमितको संख्या १७ रहेको छ । स्थानीय तहसँगको समन्वयमा ९ जना होम आइसोलेसन र ८ जना क्वारेन्टिनमा बसेका छन् ।
प्रतिक्रिया दिनुहोस !
