भेन्टिलेटर अभावमा डोटीमा कोरोना संक्रमित पुरुषको मृत्यु

डोटी : डोटीमा थप एकजना कोरोना संक्रमित पुरुषको मृत्यु भएको छ । जिल्ला अस्पताल डोटीको आइसोलेसनमा उपचार गराइरहेका उनको शुक्रबार बिहान मृत्यु भएको अस्पताल स्रोतले जनाएको छ । भेन्टिलेटर अभावमा उनको मृत्यु भएको हो । डोटी अस्पतालमा आइसीयु र भेन्टिलेटर नहुँदा कोरोनाका जटिल बिमारीलाई समस्या भइरहेको छ । 

उनी रेडियो नेपाल प्रदेश प्रशारण केन्द्र दिपायलमा इन्जिनियर पदमा कार्यरत थिए । वैशाख १५ गते मात्रै उनी अन्यत्रबाट सरुवा भएर दिपायल कार्यालयमा हाजिर भएका थिए । डोटीमा कोरोनाबाट मृत्यु हुनेको संख्या दुई पुगेको छ ।

सप्तरी जिल्ला कञ्चनपुरी नगरपालिका घर भएका ३२ वर्षीय पुरुषको मृत्यु भएको अस्पतालका मेसु कृष्णराज जाेशीले बताए । उनी २२ गतेमात्रै अस्पतालमा भर्ना भएका थिए । बिहीबार नै उनको अवस्था गम्भीर भएकाले अन्यत्र रिफरका लागि उनको कार्यालयलाई जानकारी भएपनि शुक्रबारमात्रै उनलाई बाहिर लैजाने कुरा भइरहेको जोशीले जानकारी दिए ।

जिल्ला अस्पतालमा हाल ५ जना सक्रिय कोरोनाका बिरामी उपचारत छन् । ती ५ जनाको अक्सिसन दिएर उपचार भइरहेको अस्पतालका कोभिड फोकल पर्सन राजेन्द्र फुलाराले बताए । आइसीयु र भेन्टिलेटर नहुँदा पाँचजनाको स्वास्थ्यमा समेत समस्या भइरहेको उनले बताए । 

यसअघि बुधबार डोटी, आदर्श गाउँपालिका २ का ६२ वर्षीय पुरुषको कोरोनाका कारण मृत्यु भएको थियो । डोटीमा दिनप्रतिदिन कोरोना संक्रमितको संख्यामा तीव्ररुपमा वृद्धि भइरहेको छ ।

विश्वव्यापी महामारीको रुपमा फैलिएको नयाँ भेरिएन्टसहितको कोरोना भाइरस (कोभिड–१९) को संक्रमणबाट तीन सय १६ जना संक्रमित भएका छन्।