ओखलढुंगाः देशभरका अस्पतालमा कोरोना संक्रमणका विरामीको उपचारका लागि अक्सिजन अभाव भइरहँदा ओखलढुंगामा भने यसको व्यवस्थापन शुरु गरिएको छ । जिल्लामै अक्सिजन उत्पादन प्लान्ट सञ्चालनमा रहेकाले व्यवस्थापनमा सहज भएको हो ।
ओखलढुंगा सामुदायिक अस्पतालले दुई वर्षदेखि मिनिप्लान्ट सञ्चालन गर्दै आएको छ । यसबाट दैनिक ८ सिलिन्डरसम्म भर्न सकिने भएकाले जिल्लामा सहज भएको अस्पतालका प्रशासन प्रमुख बुद्ध श्रेष्ठले जानकारी दिए । अस्पतालमा हाल ४० सिलिन्डर रहेका छन् । ती सिलिण्डर भरेर स्टक राख्ने तथा जिल्ला बाहिरबाट समेत मगाएर राख्ने तयारी थालिएको छ । अस्पतालको मिनि प्लान्टले दैनिक ठूला ८ सिलिण्डर भर्ने भएकाले जिल्ला अस्पतालमा रहेका सिलिण्डर समेत भर्ने तयारी छ । उद्योग बाणिज्य संघले २५ थाल खरिद गरेर भर्न पठाएको छ । संघको कार्यालयमा अक्सिजन सहितको आइसोलेशन निर्माण थालिएको छ ।
यहाँ १० बेड अक्सिजनसहितका हुनेछन् । संकटको अवस्थामा संघको भवनलाई आइसोलेशन वार्डका रुपमा विकास गर्न लागिएको अध्यक्ष ज्ञानेन्द मास्केले बताए । अक्सिजन सिलिन्डर खरिद गरेर संघले निशुल्क उपलब्ध गराउने छ ।
जिल्ला अस्पताल रुम्जाटारमा रहेका १९ थान समेत भरेर तयारी राख्ने जिल्ला कोभिड १९ संकट व्यवस्थापन केन्द्रले निर्णय गरेको छ । जिल्लामै उत्पादन हुने भएकाले अत्यावश्यक अवस्थामा अभाव हुन नदिन तयारी थालिएको स्वास्थ्य प्रमुख सुमन तिवारीले बताए ।
अस्पताल तथा सांसदको पहलमा २०७४ सालदेखि यहाँ अक्सिजन प्लान्ट सञ्चालनमा छ । सांसद यज्ञराज सुनुवारले अक्सिजन प्लान्ट उद्घाटन गरेर कार्यकाल शुरु गरेका थिए । उनले अघिल्लो कार्यकालमा प्लान्ट स्थापनाका लागि बजेट विनियोजन समेत गराएका थिए । यसले पहाडी जिल्लामा सहज हुने सुनुवारको भनाइ छ ।
यस्तै सो अस्पतालमा अक्सिजन समेत अभाव नहुने भएपछि हाललाई २० शैया क्षमताको कोभिड १९ केयर युनिट स्थापना गरेर सञ्चालन गर्ने सहमति भइसकेको छ । अस्पतालले प्रदेश नं. १ सरकारसँग सम्झौता गरेर विरामीको उपचारको तयारी थालेको हो । यसले ओखलढुंगा जिल्लासहित छिमेकी जिल्लाहरु सोलुखुम्बु र खोटाङलाई उपचारमा सहज हुने अपेक्षा गरिएको छ । पहाडी जिल्लामा अक्सिजन प्लान्ट सञ्चालनमा ल्याउने यो अस्पताल प्रदेशकै पहिलो हो ।
तस्वीरः ओखलढुंगा सामुदायिक अस्पतालमा सञ्चालित अक्सिजन प्लान्ट । शिवप्रसाद ढुंगाना
प्रतिक्रिया दिनुहोस !
