गुलरिया : न्यू भेरियन्टसहितको कोरोना भाइरस (कोभिड–१९) संक्रमण नरोकिएपछि बर्दिया अस्पतालको जनरल वार्डहरुमै कोभिडका बिरामीको उपचार भइरहेको छ । स्थानीय तहमा संचालनमा रहेका अस्थायी कोभिड अस्पतालमा जनशक्ति र अक्सिजन अभावका कारण गुणस्तरीय सेवा दिन नसकेपछि जिल्ला अस्पतालमा फिभरसहित अक्सिजन कमी भएका बिरामी खचाखच भरिएका छन् ।
वहिरंग, अन्तरंग, आपतकालिन, गर्भवती तथा अपरेशन, क्षयरोग, एआरटी तथा खोपलगायतका सेवा दिँदै आएको बर्दिया अस्पतालमा दोस्रो चरणअन्र्तगत कोभिड संक्रमणका बिरामी खचाखच भरिएको बर्दिया अस्पतालका प्रमुख डाक्टर सुभाष पाण्डेयले बताए । उनले भने, 'कोभिडका बिरामीलाई जनरल वार्डका १७ वटा वेडमा भर्ना गरी उपचार गरीरहेका छौं । दैनिक १ सय भन्दा बढी फिभरका बिरामी ओपीडीमा आउँछन् ।'
गर्भवती सेवा अन्र्तगत रहेको २७ वटा वेडमा सुत्केरी महिला भर्ना भइ सेवा लिइरहेका छन् । नजिकका जिल्लाबाट सुत्केरी हुन आउनेको संख्या पनि बढ्दो छ । उनले भने,' हामीसँग जनशक्ति अभाव छ । १ सर्जन, १ फिजिशियन, ५ जना मेडीकल अधिकृत डाक्टरहरु अस्पतालमा छन् । दरबन्दी र करार गरी १ सय जना जनशक्ति अस्पतालमा छन् । कोभिडका बिरामी भरिएपछि हामीलाई जनशक्ति पुर्याउन हम्मेहम्मे छ ।'
बर्दिया अस्पताल थोरै जनशक्तिमा पनि गुणस्तरीय सेवा दिने अस्पतालको रुपमा लुम्बिनी प्रदेशकै अग्रणी स्थानमा पुरस्कृत भइसकेको छ ।अस्पतालमा कोभिड परीक्षणको समस्या छ । पीसीआर परीक्षणका लागि नमूना भेरी अस्पतालमा पठाउनुपर्छ । एकसाता पुग्दा पनि रिपोर्ट आउँदैन । एन्टिजेन किट पनि अभाव छ ।
कोभिड परीक्षणको रिपोर्ट समयमा नआउँदा अनुमानको भरमा उपचार गर्नुपर्ने बाध्यता छ । पाण्डेले भने,' अक्सिजन भर्न नेपालगञ्ज जानुपर्छ । अक्सिजन भर्न प्रत्येक पटक सिफारिस माग्ने गरिन्छ । समयमा भरिँदैन । त्यसले पनि हामीलाई समस्या पारेको छ । अस्पतालले माग्ने वित्तिकै सिलिण्डर भर्ने व्यवस्था मिलाउनु पर्छ । बर्दिया अस्पतालमा सिलिण्डर अभाव छ । सानो ठूलो गरी करिब ३० वटा सिलिण्डर हामीसँग छ ।'
बर्दिया अस्पतालले नेपालगञ्जमा अक्सिजन भर्न नपाएपछि जिल्लामा निजी क्षेत्रले संचालन गरेको अक्सिजन बैंकबाट भरी सिलिण्डर लिएर बिरामीको ज्यान जोगाउनु परेको अवस्था छ । डाक्टर पाण्डेले थपे बर्दिया अस्पतालमा कोभिडसँगै नियमित बिरामीलाई सेवा प्रवाह गरेका छौं । हामीलाई आवश्यक जनशक्तिलगायत अक्सिजनको व्यवस्था भैदिए धेरै सहज हुने थियो । कोभिड अस्पतालबाट दिइने सेवा सामान्य जिल्ला अस्पतालले उपलब्ध जनशक्तिमार्फत दिएपनि प्रभावकारी सेवा पाएको स्थानीयले महशुस गरेका छन् ।
बर्दियामा कोरोना भाइरस संक्रमितको संख्या बढ्दो छ । स्वास्थ्य कार्यालय बर्दियाको तथ्यांक अनुसार चैत्र अन्तिम साता दोस्रो लहर सुरु भएदेखि हालसम्म २ हजार १५१ जना कोरोना संक्रमित बर्दियामा छन् ।
जसमध्ये ११ सय ८६ जना होम आईसोलेसन, १ सय १० जना अस्पतालमा उपचाररत छन् । १२ सय ९६ जना सक्रिय संक्रमित रहेको बर्दियामा ४६ जनाले ज्यान गुमाइसकेका छन् ।
प्रतिक्रिया दिनुहोस !
