निषेधाज्ञाका कारण मल वितरण नुहँदा परासीका किसान चिन्तित
जेठ १०, २०७८ सोमबार १४:५६:०
परासीः निषेधाज्ञाका कारण रासायनिक मल वितरण हुन नसक्दा पश्चिम नवलपरासीका किसानहरु चिन्तित बनेका छन् ।
विगतका वर्षहरुमा किसानहरुले मलको अभाव झैल्दै आएका थिए । तर अहिले जिल्लामा मल उपलब्ध भए पनि निषेधाज्ञाका कारण वितरण हुन सकेको छैन । मल वितरण हुन नसक्दा धानको बिउ राखेका किसानहरु मर्कामा परेका छन् । अहिले जिल्लाका सबैजसो किसानहरुले धानको बिउ राखि सकेका छन् ।
समयमा मल नपाउँदा उत्पादनमा समेत कमी आउने भन्दै किसानहरु चिन्तित छन् । ‘पटक पटक मलका लागि पालिका र सहकारी संस्थामा गयौँ । मल नै आएको छैन भनेर फर्काउने गरेका छन्’सुस्ता गाउँपालिका–५ का किसान वसन्त कुर्मीले भने ।
विगतमा मल अभाव हुँदा किसानहरुले भारतबाट ल्याएर खेतीमा राख्ने गरेका थिए । अहिले सीमा नाका बन्द भएकाले विकल्प पनि नरहेको प्रतापपुर गाउँपालिकाका किसान नारायण भरले बताए । ५/७ दिनभित्र मल नपाए बिउ हुर्किन नपाउने रामग्राम नगरपालिकाका किसान रामजी गुप्ताले बताए ।
जिल्लाको २९ हजार ९ सय ७५ हेक्टर क्षेत्रफलमा धान खेती हुँदै आएको छ । जसमध्ये ८० देखि ९० प्रतिशत किसानले धानको बिउ राखिसकेको कृषि ज्ञान केन्द्रकी कृषि प्रसारक अधिकृत एंव सूचना अधिकारी मनिषा पौडेलले जानकारी दिईन् । समयमा मल नपाएर स्वतः उत्पादनमा कमी आउने उनको भनाइ छ । किसानहरुलाई अहिले डिएपी मलको आवश्यक छ ।
प्रयाप्त नभए पनि तत्कालका लागि किसानहरुलाई आवश्यक पर्ने मल रहेको र निषेधाज्ञाले वितरण गर्न नसकिएको कृषि सामाग्री कम्पनी लि. परासी शाखाका प्रमुख खडानन्द बञ्जाडेले बताए । जिल्ला प्रशासनले जेठ १५ गतेसम्मका लागि निषेधाज्ञा लगाएको छ ।
निषेधाज्ञामा सम्पूर्ण पसल, व्यवसाय र बैंक तथा वित्तिय संस्थाहरु पूर्ण रुपमा बन्द गरिएको छ । कम्पनीसँग अहिले ६ सय टन डिएपी र साढे ५ सय टन युरिया मल छ । कम्पनीले जिल्लाका ५५ वटा सहकारी मार्फत मल वितरण गर्दै आएको छ ।
‘बैंकहरु बन्द छन् । सहकारीहरुले रकम जम्मा गर्न पनि समस्या छ । अर्को तर्फ मल वितरण गर्दा किसानहरुको भीड बढ्ने र कोरोना संक्रमण फैलिन सक्ने भएकाले पनि समस्या आएको छ । प्रशासनले पनि अनुमति दिएको छैन’ बञ्जाडेले भने ।
निषेधाज्ञा अवधिभर मल वितरण गर्ने अवस्था नरहेको र त्यसपछि प्रशासनको अनुमतिमा मल वितरणको व्यवस्था गर्न सकिने बञ्जाडेको भनाइ छ । किसानहरुलाई बिउ र मल लैजान रोक तोक नगरिएको प्रमुख जिल्ला अधिकारी धर्मेन्द्र मिश्रले बताए । सुरक्षित तरिकाले मल वितरणका लागि छलफल गरी किसानहरुको समस्या समाधानतर्फ लाग्ने प्रजिअ मिश्रको भनाइ छ ।
प्रतिक्रिया दिनुहोस !
