नयाँदिल्ली: घातक आँधीवेहरीका कारण भारतको पश्चिम बंगाल सहित विभिन्न स्थानमा ठूलो क्षति पुगेको छ । बुधबार कम्तिमा ९ जनाको मृत्यु भएको छ ।
भारतीय मौसम विभागका अनुसार यास आँधीका कारण ९ जनाको मृत्यु भयो । साथै पश्चिम बंगालका विभिन्न स्थानबाट ५० हजार मानिसलाई सुरक्षित स्थानतर्फ सारिएको छ । यहाँका ११०० गाउँ डुबानमा परेको बताइएको छ ।
यस आँधी अझै १२ घण्टासम्म आउनसक्ने भारतीय मौसम विभागले जनाएको छ । ओडिसामा भने भारी वर्षाका कारण १२० वटा गाउँ डुबानमा परेका छन् । र आँधीबाट बच्न यहाँका बासिन्दा पनि सुरक्षित स्थानतर्फ भागेका छन् । यस्तै यास आँधीकै कारण झारखण्डमा ८ लाख जति प्रभावित स्थानीयहरुलाई सुरक्षित स्थानतर्फ सारिँदैछ ।
वैज्ञानिकहरुका अनुसार जलवायु परिवर्तनका कारण बंगालको खाडी र अरेबिक सागरको पानी तातिएसँगै यस क्षेत्र आसपासको मौसम बिग्रिएको हो ।
साथै चक्रवातको आकारमा आएको तिब्रता मौसम परिवर्तनको कारण हुनसक्ने विज्ञहरुको भनाइ छ । यद्यपि यसबारे थप अध्ययन आवश्यकता रहेको भारतको मौसम विभागका निर्देशक डा मृत्युन्जय मोहपात्राले बताए । मोहपात्राका अनुसार हरेक वर्ष बंगालको खाडी र अरेबिक सागरमा पाँचवटा चक्रवात विकास भइरहेका छन् ।
कोरोनाभाइरस संक्रमणको नयाँ लहर सामना गरिरहेको भारतका विभिन्न स्थानमा आँधीको असर अझै रोकिएको छैन । यसअघि गुजरातमा पनि ताउते आँधीका कारण धनजनको क्षति भएको थियो ।
प्रतिक्रिया दिनुहोस !
