परासी : पश्चिम नवलपरासीको सुनवल नगरपालिकाले कोरोना संक्रमण बिरामीका लागि एचडीयू सञ्चालनमा ल्याएको छ । यसअघि १९ बेडको आइसोलेसन निर्माण गरेर उपचार सेवा सुरु गरेको नगरपालिकाले थप १० बेडको एचडीयू सञ्चालनमा ल्याएको हो ।
एचडीयू सञ्चालन गर्न ७० लाख रुपैयाँ लागत लागेको छ । उक्त रकम नगरपालिकामा रहेको सर्वोत्तम सिमेन्ट उद्योगले उपलब्ध गराएको हो । एचडीयूमा २ जना चिकित्सक र १५ जना स्टाफनर्स गरी १७ जना स्वास्थ्यकर्मी उपचारका लागि खटिएका छन् ।
जिल्लामै एचडीयू नहुँदा गम्भीर बिरामी बुटवल, भैरहवा र चितवन जानुपर्ने बाध्यता थियो । ती स्थानमा समेत बेड अभावले उपचार पाउन समस्या भएपछि नगरपालिकाले एचडीयूको आवश्यकता महशुस गरेर सो सेवा सञ्चालनमा ल्याएको नगर प्रमुख भीम बहादुर थापाले बताए ।
एचडीयूमा अहिले गम्भीर प्रकृतिका बिरामीलाई राखेर उपचार गराउँदै आइएको छ । आइसोलेसन र एचडीयूमा अक्सिजन अभाव हुन नदिन नगरपालिकाले आफ्नै लगानीमा थप ६५ थान शिलिण्डर खरिद गरेको छ ।
अहिले नगरपालिकामा अक्सिजनको अभाव नरहेको नगर प्रमुख थापाले बताए । स्वास्थ्य संस्थामा आउन नपर्ने तर अक्सिजन आवश्यक भएका बिरामीका लागि नगरपालिकाले औषधिसहित अक्सिजन घरमै पुर्याउने गरिएको नगर प्रमुख थापाको भनाइ छ । त्यसैगरी अन्यन्त्र पठाउनुपर्ने बिरामीका लागि नगरपालिकाले निःशुल्क एम्बुलेन्सको व्यवस्था समेत गरेको छ ।
आइसोलेसन र एचडीयूमा आउने सबै बिरामी निको भएर घर जाने गरेको चिकित्सकले बताएका छन् । बिरामीका लागि अक्सिजनदेखि कुनै पनि औषधिको अभाव नहरको एचडीयू वार्डकी डा. सुरवी पुनले बताइन् ।
प्रतिक्रिया दिनुहोस !
