भारतीय प्रधानमन्त्रीको प्रतिवद्धता: १८ वर्षमाथिका सबै नागरिकलाई खोप लगाइनेछ

नयाँदिल्ली: भारतका प्रधानमन्त्री नरेन्द्र मोदीले १८ वर्ष भन्दा बढी उमेरका सबै नागरिकलाई कोभिड १९ विरुद्धको खोप लगाइने प्रतिवद्धता व्यक्त गरेका छन् ।

सोमबार साँझ राष्ट्रको नाममा सम्बोधन गर्दै उनले यस्तो बताएका हुन् । साथै प्रधानमन्त्री गरिब कल्याण अन्न योजनालाई आगामी नोभेम्बर अर्थात् दिपावलीको समयसम्म निरन्तर बनाउने पनि उनले बताए । जुन योजना अन्तर्गत सरकारले हरेक नागरिकलाई निशुल्क खाद्यान्न वितरण गरिन्छ ।

"बितेको १०० वर्षमा आएको यो सबैभन्दा ठूलो महामारी हो । यस्तो महामारी विश्वमा न यसअघि देखिएको थियो न अनुभव नै गरिएको थियो । जुन २१ योग दिवसपछि १८ वर्ष भन्दा बढी उमेरका सबै नागरिकका लागि भारत सरकार विभिन्न राज्यलाई खोप प्रदान गर्नेछ" प्रधानमन्त्री मोदीले भनेका छन् ।

मोदीका अनुसार खोपको ७५ प्रतिशत केन्द्र सरकारले खरिद गरी राज्य सरकारहरुलाई प्रदान गर्नेछ । आफ्नो सम्बोधनको क्रममा मोदीले देशभर २३ करोड नागरिकलाई खोप प्रदान गरिएको पनि बताएका छन् । सबै देशबासीलाई सरकारले नै निशुल्क खोप उपलब्ध गराउने उनको प्रतिवद्धता थियो ।

कोभिड विरुद्धको लडाइँको क्रममा बितेको सवा वर्षको अवधिमा भारत सरकारले नयाँ स्वास्थ्य संरचना तयार पारेको समेत उनको दावी थियो ।

"आज देशमा २३ करोड मानिसलाई कोरोना विरुद्धको खोप लगाइएको छ । हाम्रो प्रयासमा सफलता तब मिल्यो जब हामीलाई स्वयंमाथि विश्वास थियो" मोदीले सम्बोधनको क्रममा भने । यस्तै बालबालिकाहरुका लागि समेत खोप परीक्षण भइरहेको मोदीले बताए । नाकबाट उनीहरुलाई खोप लिइने गरी परीक्षण भइरहेको उनको भनाइ थियो ।

भारतमा सोमबार १ लाख ६ सय ३६ जनामा कोरोना संक्रमण पुष्टि भएको छ । जुन पछील्लो ६१ दिनयताकै सबैभन्दा कम रेकर्ड हो । भारत सरकारको तथ्यांक अनुसार हालसम्म २ करोड ८९ लाख ९ हजार ९ सय ७५ जना भारतीय संक्रमित भइसकेका छन् ।

साथै ३ लाख ४९ हजार भन्दा धेरैको मंत्यु भइसकेको छ । साथै पछिल्लो २४ घण्टामा २ हजार ४ सय भन्दा धेरैको मृत्यु भयो । जुन पछिल्लो ४५ दिनमा सबैभन्दा कम मृत्यु हो ।