पेरिस : शीर्ष वरीयताका नोभाक जोकोभिच र तेस्रो वरीयताका राफेल नाडाल फ्रेन्च ओपन टेनिसको सेमिफाइनलमै भिड्ने भएका छन्। सर्बियन स्टार जोकोभिचले इटालीका माटियो बेर्रेटिनीलाई पराजित गर्दै नाडालसँगको भेट पक्का गरेका हुन्।
यी दुई स्टारले गत वर्ष फाइनल खेल्दा नाडालले उपाधि जितेका थिए।
पेरिसमा बुधबार राति भएको खेलमा जोकोभिचले सुरुआती दुई सेट ६–३, ६–२ ले सहज जित निकाले पनि त्यसपछि भने निकै संघर्ष गर्नुपरेको थियो। तेस्रो सेट ७–६(५–७) ले गुमाएका उनले चौथो सेट ७–५ ले आफ्नो पक्षमा पारेका थिए। यसैगरी स्पेनिस स्टार नाडालले १०औं वरीयताका अर्जेन्टनी खेलाडी डिएगो स्वार्टजमानलाई पराजित गर्दै १४औं पटक फ्रेन्च ओपनको सेमिफाइनलमा स्थान बनाउन सफल भएका छन्। पेरिसमा पहिलो सेट ६–३ ले सहजै आफ्नो पक्षमा पारे पनि नाडालले दोस्रो सेट ४–६ ले गुमाएका थिए। त्यसपछिको दुवै सेट नाडालले ६–४, ६–० ले आफ्नो पक्षमा पार्न सफल भएका थिए।
प्रतिक्रिया दिनुहोस !
