म्यानमार: आङ सान सू चीमाथि सेनाले लगायो भ्रष्टाचार मुद्दा, १५ वर्षसम्म जेल राख्‍नसक्ने

नपिद्‍व: म्यानमारकी नेत्री आङ सान सू चीमाथि यहाँको सैन्य सरकारले नयाँ भ्रष्टाचार मुद्दा दायर गरेको छ । यदी यस मुद्दामा सू चीको पराजय भएको अवस्थामा सैन्य सरकारले उनलाई १५ वर्षसम्म जेल सजाय दिनसक्ने छ ।

हिरासतमा राखिएकी नेत्री सू ची माथि उनीमाथि सैन्य सरकारले राजद्रोहको मुद्दा सहित दर्जन जति मुद्दा लगाएको छ । नेत्री सू चीले वितगमा उनको पार्टी सरकारमा छँदा पदको दुरुपयोग गरी भ्रष्टाचार गरेको ठहर भएको आरोप उनीमाथि लगाइएको हो ।

यहाँको भ्रष्टाचार विरुद्ध आयोगले सू चीमाथि छानविन गरेपछि यस्तो अभियोग लगाइएको स्थानीय मिडियाले जनाएका छन् । सू चीको पार्टी गत महिना नै निर्वाचन आयोगले खारेज गरिदिएको थियो ।

७५ वर्षीया नेत्री सू चीलाई यहाँको सैन्य सरकारले गत वर्षको फेब्रुअरी १ मा सत्ता कब्जा गरेपछि लगत्तै हिरासतमा राखेको छ । नोभेम्बरमा भएको निर्वाचनमा उनको पार्टीले धाँधली गरेर जितेको भन्दै सेनाले कू गरेको हो ।

भ्रष्टाचार निवारण आयोगले समेत सू चीले उनको कार्यकालमा पैसा, सुन लगायत ६ लाख अमेरिकी डलर रकम बराबरको सम्पत्ति गैरकानूनी रुपमा कमाएको आरोप लगाएको छ । गत महिना सू ची राजधानी नपिद्वस्थित हिरासत बसेपछि पहिलो पटक अदालत उपस्थित भएकी थिइन् ।

सू चीका वकिल खिन मङ्ग जावले उनीमाथिको भ्रष्टाचार अभियोगलाई असंगत र आधारहीन भएको प्रतिक्रिया दिएका छन् । कानून व्यवसायीहरुका अनुसार उनीमाथिको मुद्दाबारे १४ जुनदेखि सुनुवाइ हुनेछ । सू चीमाथि कोभिड १९ विरुद्ध सुरक्षा रणनीति उल्लंघन गरेको मुद्दा समेत परेको छ ।

यसवाहेक म्यानमारमा अझै सेना विरोधी आन्दोलन रोकिएको छैन । शुक्रबार समेत यहाँ सयौँ नागरिकलाई सेनाले पक्राउ गरिसकेको छ । सैन्य कू को विरोधमा हालसम्म भएका प्रदर्शनको क्रममा सुरक्षाकर्मीबाट ८५० नागरिक मारिएका छन् । साथै ५९४१ जना पक्राउ परेका छन् ।