स्वास्थ्य सेवालाई विकास एजेण्डा बनाउन जनप्रतिनिधिलाई सुझाव
असार २६, २०७८ शनिबार १५:५०:०
परासीः स्वास्थ्य सेवालाई समेत विकासको एजेण्डा बनाउन पश्चिम नवलपरासीका स्थानीय तहहरुलाई सुझाव दिइएको छ ।
अहिले स्थानीय तहका वडा सदस्यहरुले स्वास्थ्य प्रणालीको नेतृत्व गरिरहेकाले स्वास्थ्य सेवालाई समेत विकासकै योजनाका रुपमा अघि सारेर बजेट विनियोजन गर्न जनप्रतिनिधिहरुलाई सुझाव दिइएको हो ।
पश्चिम नवलपरासीको रामग्राम नगरपालिकाले नगर क्षेत्रको स्वास्थ्य प्रणालीको सुधार गर्न तयार पारेको ‘स्वास्थ्य प्रणाली सुदृढिकरण प्रतिवेदन’मा उक्त सुझाव दिइएको हो ।
नगरपालिकाको सहयोगमा एक्सन अर्गेष्ट हंगर नामक गैर सरकारी संस्थाले तयार गरेको प्रतिवेदन ३ वर्षे कार्य योजनासहितको छ । कार्य योजनामा नगर क्षेत्रमा रहेका स्वास्थ्य समस्या, सुदृढिकरण र रणनीतिहरुलाई अवलम्बन गरेर २०८१ को अन्तसम्म नगर क्षेत्रमा रहेका सबै स्वास्थ्य संस्थाहरुमा आवश्यक स्वास्थ्य सेवादेखि भौतिक पूर्वाधार र आधारभूत सामग्रीहरु राष्ट्रिय मापदण्ड अनुसार हुने अपेक्षा लिइएको छ ।
नगर क्षेत्रको स्वास्थ्य प्रणाली सुधारका लागि नगरपालिका आफैंले पहिलो पटक सुझावसहितको प्रतिवेदन तयार गरेको नगर प्रमुख नरेन्द्र कुमार गुप्ताले बताए । प्रतिवेदनमा आएका सुझावका आधारमा आवश्यक बजेट विनियोजन गरेर नगर क्षेत्रको स्वास्थ्य क्षेत्रको सुदृढिकरण गर्ने उनले बताए ।
प्रतिवेदन अध्ययनपछि स्वास्थ्य कार्यालयका प्रमुख कृष्ण प्रसाद पोखरेलले स्थानीय तहहरुलाई मात्र नभई स्वास्थ्य अधिकारीहरुलाई समेत यो प्रतिवेदनले स्वास्थ्य रणनीति बनाउन सहयोग पुगेको बताए ।
प्रतिवेदनमा नगर क्षेत्रको स्वास्थ्य अवस्थाको सबल र कमजोर पक्ष तथा सुधार गर्नुपर्ने पक्षहरु समावेश छन् । विश्व स्वास्थ्य संगठनले निर्धारण गरेको स्वास्थ्य प्रणालीको ६ आधार स्तम्भ र १ सय १४ वटा सूचकलाई समावेश गरिएको प्रतिवेदन तयार गर्न २ वर्ष लागेको हो ।
प्रतिक्रिया दिनुहोस !
