प्रदेश सरकारको लगानी बालुवामा पानी: हरित पार्क झाडीमा परिणत
असार २७, २०७८ आइतबार १७:२१:०
विराटनगरः विराटनगर ५ स्थित केशलीया खोलाको बगरमा हरीयाली पार्क निर्माणका लागि प्रदेश सरकारको लगानी बालुवामा पानी जस्तै भएको छ ।
गत आर्थिक वर्षमा प्रदेश १ सरकारको उद्योग, पर्यटन, वन तथा वातावरण मन्त्रालयको पर्यटन विकास आयोजना अन्तर्गत ५०को लगानीमा सुरु भएको पार्क निर्माणमा यस वर्ष आएको रकम फ्रिज भएपछि लगानी बालुवामा पानी जस्तै भएको हो ।
विराटनगर विमानस्थल अन्तर्राष्ट्रिय स्तरको निर्माण हुने भएपछि पार्क निर्माणको जग्गा पर्ने भएकाले प्रदेश सरकारको लगानी बालुवामा पानी जस्तै भएको हो । यस वर्ष पार्क निर्माणको लागि आएको ३५ लाख विनयोजित रकम काम नै नगरी फ्रिज भएको छ ।
सुनसरी मोरङ सीमा भएर बग्ने केशलीया खोलाले सदैव कटान गर्ने सो स्थानमा पार्क निर्माणको काम गत वर्षको असारमा सुरु भएको थियो । पार्क निर्माण गर्न आएको रकम फिर्ता गएपछि पार्क अहिले झाडीमा परिणत भएको छ । गत आर्थिक वर्षको पानी झरीमा ५० लाखको लगानीमा हरीयाली पार्कको निर्माण सुरु भए पनि ४० लाख मात्र खर्च हुन सकेको थियो । त्यस क्रममा वाल, ५ वटा रुखमा चौतारा निर्माण गरिएको थियो । त्यहाँ निर्माण गरिएको शौचालयको आधा काम मात्र भएको छ ।
केशलीया खोलाको डिलमा हरित पार्क हुलाकी राजमार्गमा पर्ने विराटनगर–५ स्थित केशलीया खोलाको डिलमा निर्माणाधीन छ । प्रदेश १को राजधानी विराटनगरमा बाहिर र आन्तरिक पर्यटकलाई घुम्ने ठाउँको रुपमा हरीत पार्कको निर्माण गर्ने योजना मन्त्रालयको थियो ।
तर विराटनगर विमानस्थालको स्तरोन्नती हुने भएपछि निर्माणधिन पार्क समेत पर्ने भएकाले यस काम रोकिएको विराटनगर महानगरपालिका वडा नम्बर ५का वडा अध्यक्ष मिन कुमार अचार्यले बताए ।
दोस्रो चरणको काम सुरु गर्नु भन्दा पहिले नै पार्क निर्माणको जग्गामध्ये करिव १० कठ्ठा जग्गा विराटनगर विमानस्थालमा पर्ने भएकाले काम नगरी रकम फ्रिज भएको उनले बताए । बनाएर तोड्नु पर्ने भएकाले विमानस्थलमा पर्ने जग्गामा वाल लगाएपछि काम गर्ने योजना बनाएको उनले बताए ।
वडाध्यक्ष अचार्यले भने: यस वर्ष काम भएन
कोरोनाको संक्रमण नियन्त्रणका लागि सरकारले लगाएको लकडाउनको बेला मन्त्रालयले उपभोक्ता समितिसँग सम्झौता गरेर गत वर्ष काम सुरु गरेको थियो ।
गत आर्थिक वर्षमा मन्त्रालयसँग बैसाख २३ गते सम्झौता गरेर जेठ महिनादेखि काम सुरु गरेको थियो । स्थानीयहरु असारमा नै विना योजना पार्कमा बजेट खर्च गर्न काम सुरु गरेको भन्दै विरोध जनाउँदै आएका थिए । करिव १ विगाहा १३ कठ्ठाको क्षेत्रफलमा उपभोक्ता समितिले पर्खाल, ट्वाइलेट र गेट बनाउने भन्दै काम सुरु गरेको थियो । तर गेट र शौचालय समेत बनाउन नसकेर रु १० लाख गत वर्ष पनि फिर्ता भएको थियो ।
आर्थिक वर्ष सकिनै लाग्दा उपभोक्ता समितिले पानी परिरहेका बेला समेत आफुखुसी पर्खाल निर्माणको काम गर्दै आएकाले निर्माण काम गुणस्तरहीन भएको स्थानीयहरुले बताएका छन् । गत वर्ष स्वर्गीय मदन भण्डारीको ६९ औं जन्म जयन्तीको अवसरमा नेकपा विराटनगर महानगर कमिटीले गरेको कार्यक्रममा मुख्यमन्त्री शेरधन राईले त्यहाँ वृक्षरोपण गर्न जाँदा हिलाम्मे र पानी जमेको स्थानमा काम हुँदै थियो ।
प्रतिक्रिया दिनुहोस !
