चितवनमा तेस्रो भेरिएन्टको खतरा, तर तयारी सुस्त
![चितवनमा तेस्रो भेरिएन्टको खतरा, तर तयारी सुस्त](https://annapurnapost.prixacdn.net/media/albums/1_20210731081904_6emxzeMJtJ.jpg)
चितवन: स्वास्थ्य तथा जनसंख्या मन्त्रालयले कोरोना भाइरस संक्रमणको तेस्रो लहर आउनसक्ने भन्दै सचेत गराएको छ ।
निषेधाज्ञा खुकुलो भएसँगै सङ्क्रमण दर बढ्दो देखिएपछि संभावित खतराको आंकलन गरिएको छ । तैपनि कोरोना संक्रमणको सम्भावित खतरा रोक्न खासै तयारी देखिएको छैन । जवकि स्वास्थ्य मन्त्रालयले तेस्रो भेरिएन्टको भयावह हुन सक्ने भन्दै सचेत गराउँदैआएको छ।
स्वास्थ्य कार्यालय चितवनले पछिल्लो समय सङ्क्रमितको संख्या बढ्दै गएका कारण कोरोनाको तेस्रो लहर चाँडै आउन सक्ने अनुमान गरेको छ । स्वास्थ्य कार्यालय चितवनका प्रमुख दीपक तिवारीले यसअघि डेल्टा भेरिएन्ट देखिएको हुनाले समुदायमा यसको सङ्क्रमण रहन सक्ने खतरा भएको बताए ।
‘दुई जनामा डेल्टा भेरिएन्ट भेटिएपछि समाजमा नहोला भन्न सकिन्न । त्यसको असर समुदायमा हुन सक्छ ’तिवारीले भने ‘अरुमा पनि यो भेरिएन्ट देखिन सक्छ, सावधान हुन जरूरी छ ।’
जिल्लामा कार्यरकत चिकित्सकहरु तयारी नपुगेको बताउँछन् । दोस्रो भेरिएन्टको संक्रमणको महामारी हुँदा केही माहोल बढे पनि फेरि सुस्ताएको छ । अस्पतालमा भेन्टीलेटरको संख्या बढेको छैन । महामारीको बेला जोखिम कम गर्न छुट्टै कोभिड अस्पताल बनाउने भनिए पनिअहिलेसम्म हुन सकेको छैन ।
अक्सिजन प्लान्टहरु थप्ने भनिए पनि कहीँ पनि कामको प्रगति भएको छैन । अब आउने भेरिएन्टले क्षति गर्न सक्ने आंकलन गरिए पनि त्यसको नियन्त्रणको लागि तयारी नभएको एलाइभ अस्पतालका प्रमुख डा प्रमोद लामिछानेले बताए । ‘यहीअवस्था हो भने अब आउने महामारीले दुख देला जस्तो छ ’ उनले भने ‘जति गम्भीर हुन पर्ने हो, जुन रफ्तार हुनु पर्ने हो त्यो देखिएको छैन ।’
अघिल्लो दुई चरणमा सबैभन्दा बढी जनशक्तिको कारण समस्या देखिएको थियो । चिकित्सकहरुले स्वास्थ्यकर्मी र चिकित्सकको मनोबल बढाउन सरकारसँग पटक पटक माग गरेका थिए । अस्पतालमा खटिने अग्रपंक्तिका चिकित्सक र स्वासथ्यकर्मीका लागि तालिम दिइएको छैन । तयारीको सुरुवात बसैभन्दा पहिले जनशक्तिको व्यस्थापनबाट गर्न नेपाल चिकित्सक संघका बरिष्ठ उपाध्यक्ष डा. अनिल विक्रम कार्कीले बताए ।
जनशक्ति व्यवस्थापनमा सबैभन्दा पहिले तयारी गर्न जनशक्ति व्यवस्थापन नभएपछि असर पर्न सक्ने उनको भनाइ थियो । ‘२० वर्षअघिको दरबन्दीले चलिरहेको जनशक्तिले अबको महामारीमा काम गर्न सक्दैनन्, ’ उनले भने ‘ चुनावमा म्यादी प्रहरी जस्तो नियुक्त गरेर कसरी काम हुन्छ ? दक्षता, योग्यता र क्षमताको आधारमा नियुक्त गरिनुपर्छ । ’
डेल्टा भेरिएन्ट सबै उमेर समूहका व्यक्तिलाई हुने र यसले फोक्सोमा बढी असर गर्ने र छिटो फैलिने चिकित्सकहरु बताउँछन् । पहिलो लहरको अल्फा भेरिएन्ट भन्दा यो बढी जोखिमयुक्त हुने र हावाबाट पनि सर्ने विशेषज्ञ चिकित्सकहरुले बताएका छन् ।
तेस्रो लहरले बालबालिकालाई बढी प्रभाव पार्ने भनिएको छ । तर बालबालिका लक्षित गरेर तयारी खासै छैन । चितवन मेडिकल कलेजले बालबालिकाका लागि सघन उपचार कक्ष बनाइसकेको छ । नेपाल सरकारको नीति तथा कार्यक्रमअन्तर्गत २ करोड ४० लाख बजेटमा भरतपुर अस्पतालमा पनि कोभिड लक्षित गरेर पिआईसियु बनाउने प्रक्रियाको टेण्डर भइसकेको छ । तर २० बेड चितवनको लागि पर्याप्त नभएको भरतपुर अस्पतालका बरिष्ठ बालरोग विशेषज्ञ डा. युवा निधि बसौलाले बताए । ‘भरतपुर रिफर सेन्टर हो, यहाँ चितवनको मात्रै नभएर अन्यत्रबाट समेत विरामी आँउछन् । यही अवस्थाले धान्न गारो छ ।’
यसअघि चितवनमा पाँच जना शङ्कास्पद बिरामीको नमुना जाँचमा दुई जनामा डेल्टा भेरिएन्ट पुष्टि भएको थियो । भरतपुर अस्पतालले राष्ट्रिय जनस्वास्थ्य प्रयोगशाला काठमाडौँ पठाएको थियो । सो प्रयोगशालाले तीमध्ये दुईवटा नमुना मात्रै अन्तर्राष्ट्रिय प्रयोगशालामा पठाएको थियो । दुवै नमुनामा डेल्टा भेरिएन्ट प्रमाणित भएको थियो ।
अहिले चितवन जिल्लामा पछिल्लो समय कोरोना सङ्क्रमित बिरामीहरुमा नयाँ डेल्टा भेरिएन्ट देखिएको छैन । भरतपुर अस्पतालका कोभिड क्लिनिकल कोर्डिनेटर डा. प्रमोद पौडेलले पछिल्लो समय डेल्टा भेरिएन्टका शङ्कास्पद बिरामी नभेटिएको बताए ।
बिस्तारै चितवनमा कोरोना सङ्क्रमितका बिरामी बढ्न थालेका छन् । असपतालमा विस्तारै विरामीको चाप बढ्न थालेको छ । यही आधारमा सङ्क्रमितको संख्या बढ्दैगए तेस्रो लहर चाँडै आउन सक्ने तिवारीले बताए । त्रसित नभई सङ्क्रमण रोक्न जनस्वास्थ्य मापदण्डको पूर्ण पालना गर्नु स्वास्थ्य कार्यालय चितवनले सबैमा आग्रह गरेको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)