इटहरी : इटहरीस्थित यातायात कार्यालयको भवन सेटिङमा सारिएको छ । केही साताअघि अन्नपूर्ण पोस्ट्ले सेटिङमा कार्यालय सार्न लागिएको खुलासा गरेको थियो ।
समाचारमा उल्लेख गरेकै घरमा मासिक ७५ हजार रुपैयाँ तिर्ने गरी कार्यालय सारिएको छ । अहिले कार्यालयको सवारीचालक अनुमतिपत्रसम्बन्धी सबै काम उक्त कार्यालयबाट भइरहेको कार्यालयका प्रमुख प्रेमप्रसाद सापकोटाले जानकारी दिए ।
सापकोटाका अनुसार कार्यालयले भाडाको घर खोज्दै जेठ ११ गते जारी गरेको सूचनाअनुसार चारवटा घरका लागि आवेदन दिइएको थियो । सोमध्ये घरभाडादेखि प्राविधिक उपयुक्तता सबै हेरेर अहिलेको घर छानिएको हो । यो सबै काम सेटिङमा गरिएको स्रोतको भनाइ छ ।
सोही घरमा यातायात कार्यालय सार्ने गरी सूचना प्रकाशन गरिएको थियो । सो समयमा उक्त घर निर्माणाधिन थियो । सूचनामा दिइएको विवरण र उक्त निर्माणाधिन घरको विवरण मिलेपछि र स्थानीयले समेत यातायात कार्यालय यही सर्दैछ भन्ने जानकारी दिएपछि सेटिङ भएको खुलेको थियो ।
प्रकाशित सूचनामा तोकिएका जटिल शर्तहरु पूरा भएको घर कतै पाउन मुस्किल पर्छ । सूचनाअनुसार महेन्द्र र कोशी राजमार्गमा नपर्ने र चोकबाट दुई किलोमिटरको दुरीमा पर्ने, ८ कठ्ठा क्षेत्रफल जग्गामा घेराबारा लागेको, भुँइतलामै मात्र कम्तिमा ४१०० स्क्वायर फिट क्षेत्रफलमा १५ कोठे भवन भएको, प्यासेज ७ फिट चौडा हुनुपर्ने, सकेसम्म झ्यालबाटै सेवा दिन सकिने हुनुपर्ने, कम्तिमा ६ वटा ट्वाइलेट, बाथरुम भएको हुनुपर्ने शर्तहरु उल्लेख थियो ।
त्यती मात्र होइन, लिखित परीक्षा दिनका लागि ६० फिट लम्बाइ र १५ फिट चौडाइ भएको परीक्षा हल पनि हुनुपर्ने भनिएको थियो । यस्तै २० फुटको बाटो हुनुपर्ने र कार्यालयबाहेक थप दुई कठ्ठा जग्गा पार्किङको लागि उपलब्ध हुनुपर्ने उल्लेख थियो । तर यति धेरै शर्तसहितको बनिबनाउ घर पाउन अहिले पनि असम्भव छ ।
तर, त्यही अनुसारको घर उक्त सूचना प्रकाशित हुनुभन्दा ५ महिनाअघिदेखि इटहरी ८ स्थित रोहित चौधरीको जग्गामा बनिरहेको थियो । कार्यालयले सूचना प्रकाशनपछि नयाँ घर फेला नपर्दै एक महिनाभित्र कार्यालय घर सर्ने जानकारीसमेत त्यतीबेलाका घरबेटी दिनेश भट्टराईलाई दिइसकेको थियो ।
यसअघि बसेको घर राजमार्गको छेवैमा परेको र दुर्घटनाको जोखिममा रहेको भन्दै सार्नैपर्ने निष्कर्ष निकालिएको थियो । कार्यालय सार्ने निष्कर्षअघि नै इटहरी ८ स्थित अहिलेको ठाउँमा भवन बनाउने र त्यही भवनलाई नै कार्याँलयको लागि छनोट गर्ने गरी सुचना निकाल्ने गरी सेटिङ भएको थियो ।
यातायात कार्यालयका प्रमुख सापकोटा भने आरोपको खण्डन गर्छन् । उनले पहिले राजमार्ग छेउको कार्यालय बस्न अनुपयुक्त भएको र जोखिम पनि बढेपछि र प्रदेश मन्त्रीले पटकपटक सार्नुपर्छ भनेपछि आफूहरुले पनि सूचना निकालेको बताउँछन् ।
यता यातयात कार्यालय प्रदेश प्रमुख भीम गौतम पनि सोही घर छनोटमा पर्नुलाई संयोग मात्र मान्छन् । तर यातयात सार्नको लागि बहालवाला प्रदेश मन्त्री अम्बिरबाबु गुरुङ, कार्यालयका प्रदेश प्रमुख भीम गौतम र कार्यालय प्रमुख सापकोटासमेतको संलग्नता रहेको बताइएको छ ।
यसअघि पनि मन्त्री गुरुङ राज्यमन्त्री हुँदा अहिलेकै प्रदेश प्रमुख गौतमको सिफारिसमा झापामा निजी निजी सेन्टरमा ट्रायल गर्ने गरी निर्णय भएको थियो । सरकारी संरचना हुँदा हुँदै विभिन्न बहाना झिकेर निजी सेन्टरलाई महँगो भाडा तिर्ने गरी जिम्मा दिने कार्यमा गुरुङ र गौतमको संलग्नता रहेको चर्चा चलेको थियो ।
प्रतिक्रिया दिनुहोस !
