परासी : भारतीय प्रहरीको ‘मोस्टवान्टेड’ सूचीमा रहेका लागूऔषध कारोबारी गोविन्द गुप्ता (रौनियार) सीमावर्ती नेपाली गाउँमा लुकेको आशंका गरिएको छ । सोही आशंकाका आधारमा पश्चिम नवलपरासी प्रहरीले खोजतलासमा तीव्रता दिएको छ ।
गोविन्दले लामो समयदेखि नवलपरासी हुँदै नेपालका विभिन्न सहरमा लागूऔषध पठाउने गरेको भारतीय अधिकारीहरूले जनाएका छन् । लागूऔषध कारोबारी गोविन्दको घर पश्चिम नवलपरासीको सीमावर्ती बजार महेशपुरदेखि करिब ५ किलोमिटरको दूरीमा छ । भारतीय सुरक्षा टोलीले हप्ता दिनअघि गोविन्दको घरमा छापा मारेर २ करोड बढी नेपाली रुपैयाँको लागूऔषध बरामद गरेको थियो ।
औषधि व्यवसायीका रूपमा परिचित गराउन गोविन्दले गाउँ नजिकैको गडौरा बजारमा मेडिकल सञ्चालन गर्दै आएका थिए । लागूऔषधको गोदाम भने घरमै बनाएर राखेका थिए । गोदाममा ठूलो परिमाणमा लागूऔषध लुकाएर राखेको आशंकमा भारतीय सुरक्षा टोलीले छापा मार्दा बरामद गरेको थियो । मुख्य कारोबारी गोविन्द अहिले फरार छन् । कारोबारमा संलग्न भएको भन्दै उनका भाइ रमेशलाई पक्राउ गरी कारबाही प्रकृयाअघि बढाइएको भारतीय अधिकारीहरूलाई उद्धृत गर्दै ठूठीबारीका पत्रकार मनोज कुमार जोशीले बताए । फरार गोविन्दलाई मोस्टवान्टेडको सूचीमा राखी त्यहाँको प्रहरीले २५ हजार भारतीय रुपैयाँको पुरस्कारसमेत घोषणा गरेको छ ।
नवलपरासीको गेर्मी, महेशपुर, विष्णुपूरालगायतका सीमावर्ती गाउँमा लुकेको आशंकामा सादा पोशाकका भारतीय प्रहरीहरू आएर निगरानी बढाएको त्यहाँका स्थानीयले बताएका छन् । गोविन्द सीमावर्ती गाउँमा लुकेको आशंकामा निगरानीलाई बढाइएको जिल्ला प्रहरी कार्यालयका एसपी मनोजकुमार यादवले बताए । ‘भारतीय प्रहरीले उनलाई खोजी गर्न पत्रचार नगरे पनि नेपालमा लागूऔषध पठाउने कारोबारीलाई पक्राउ गर्नु आफूहरूको पनि दायित्व भएकाले अप्रेसन सुरु गरेका हौं,’ एसपी यादवले भने ।
फरार गुप्ताका आफन्त नवलपरासीका सीमावर्ती गाउँमा रहेको आशंकामा प्रहरीले ती घरहरूमा छापासमेत मारेको यादवले बताए । स्रोतका अनुसार प्रहरी पुग्नुअघि नै गोविन्द त्यहाँबाट भागेका कारण प्रहरीको अप्रेसन सफल हुन नसेको बताइएको छ । प्रहरीले मातहतका सबै प्रहरी चौकीहरूमा गोविन्दको फोटो पठाएर खोजबिनलाई तीव्रता दिएको एसपी यादवले जानकारी दिए ।
प्रहरीले जिल्लामा अप्रेसनलाई तीव्रता दिएपछि उनी भागेर रुपन्देही पुगेको आशंकासमेत गरिएको छ । नवलपरासीको नाका हुँदै नेपालका विभिन्न सहरमा लागूऔषधको जालो फैलाउने गोविन्दले केही नेपाली युवाहरूलाई प्रलोभनमा पारेर साइकल र मोटरसाइकलमार्फत ओसारपसार गराउने गरेको समेत बताइएको छ । यसअघि पनि गोविन्दमाथि भारतीय प्रहरीले लागूऔषधमा मुद्दा दायर गरेको थियो । तर, उनी पक्राउ पर्न सकेका छैनन् । उनलाई त्यस क्षेत्रमा लागूऔषधका ‘डन’ भनेर चिनिने गरिएको बताइएको छ ।
गोविन्दको घरमा छापा मारेर भारतीय प्रहरीले २८ हजार २ सय २० इन्जेक्सन, १८ हजार ७ सय ८२ सीसी सिरप, ३ लाख १३ हजार ३ सय ८४ क्याप्सुल, १ लाख २४ हजार ८ सय ७५ ट्याब्लेट बरामद गरिएको छ । त्यस्तै, नयाँ मूल्य टाँस्नका लागि राखिएको १ लाख ३४ हजार ४ सय ६० वटा स्टिकरसमेत बरामद गरेको थियो । उक्त लागूऔषधको अन्तर्राष्ट्रिय मूल्य (डलर) का आधारमा ६ अर्ब ६८ करोडको बरामद भएको भारतीय अधिकारीहरूलाई उद्धृत गर्दै त्यहाँका सबैजसो सञ्चार माध्यमहरूले जनाएका छन् । यद्यपि, त्यहाँ बिक्री हुने लागूऔषधको बजार मूल्यको तुलना गर्दा २ करोड नेपालीको हाराहारीमा रहेको भारतीय मेडिकल सञ्चालकहरूले बताएका छन् ।
प्रतिक्रिया दिनुहोस !
