काठमाडौँ: नेपाली कांग्रेसको महाधिवेशन अन्तत सर्ने निश्चित जस्तै भएको छ । पार्टीको वैधानिकता जोगाएर महाधिवेशनको मिति सार्ने कानूनी कसरतमा नेताहरु लागेका छन् ।
चार वर्षमा महाविधेशन गर्न नसकेर एक वर्षको थप सुविधा कांग्रेसले पाएको हो । कानूनले दिएको अर्को ६ महिने सुविधा पनि प्रयोग गरिसकेको अवस्थामा अझै महाधिवेशनको मिति टुंगो लाग्न सकेको छैन ।
वरिष्ठ नेता रामचन्द्र पौडेल निर्धारित मितिमै महाधिवेशन गर्नुपर्ने अडानमा छन् भने सभापति देउवा मंसिरमा महाधिवेशन गर्ने गरी नयाँ कार्यतालिका ल्याउने तयारी अनुरुप अगाडी बढेको देखिन्छ । देउवाको यस्तो प्रस्तावमा महामन्त्री डा. शशांक कोइराला र पूर्वमहामन्त्री कृष्ण प्रसाद सिटौला पनि सकारात्मक छन् ।
बुधबार बसेको शिर्ष नेताको बैठकमा पार्टी सभापति शेरबहादुर देउवाले पार्टीको १४ औं महाधिवेशन मंसिरमा गर्न प्रस्ताव गरेका छन् । बुधबार दिउँसो २ बजेदेखि देउवा निवास बूढानीलकण्ठमा बसेको शीर्ष नेताको बैठकमा देउवासहित संस्थापन पक्षका नेताहरूले तोकिएकै मितिमा वडा अधिवेशन सुरू गर्ने र मंसिरमा महाधिवेशन गर्ने प्रस्ताव गरेका हुन् ।
वरिष्ठ नेता रामचन्द्र पौडेलले वैधानिकतामा प्रश्न उठ्ने भन्दै भदौ २३ अगाडि नै तल्लो तहको अधिवेशन सुरू गर्ने र असोजको पहिलो सातामा महाधिवेशन सम्पन्न गर्नुपर्ने अडान लिएका छन् । दुवैतर्फका नेता आ आफ्नो अडानमा टसमस नभएपछि विना निष्कर्ष बैठक सकिएको बैठकमा सहभागी एक नेताले बताए ।
बैठकमा सहभागी शिर्ष नेता कृष्ण प्रसाद सिटौलाका अनुसार बुधबार ठोस निष्कर्ष भएन "बिहीबार फेरि बैठक बस्नेछ र अगाडि हुने वा पछाडि हुने भन्ने कुरा मिल्ला ।"
बैठकमा सभापति शेरबहादुर देउवा, वरिष्ठ नेता रामचन्द्र पौडेल, पूर्वमहामन्त्री कृष्ण प्रसाद सिटौला, महामन्त्रीद्वय डा. शशांक कोइराला र पूर्णबहादुर खड्का, सहमहामन्त्री डा. प्रकाशशरण महत, डा. मिनेन्द्र रिजाल र रमेश लेखक सहभागी थिए ।
प्रतिक्रिया दिनुहोस !
