दार्चुला : दार्चुलामा आइतबार आएको बाढि र पहिरोमा परी अहिलेसम्म तीनजनाको मृत्यु भएको छ भने दुई जना वेपत्ता भएका छन् । बाढिपहिरोमा परि दुहुँ गाउँपालिका र महाकाली नगरपालिकाका विभिन्न क्षेत्रमा भौतिक तथा मानवीय क्षति भएको छ ।
पहिरोले घर पुरिँदा दुहुँ गाउँपालिका-१ बासपालिकामा नरसिंह महर र उनकी श्रीमती कौशा महरको मृत्यु भएको प्रहरी प्रमुख मनोहर भट्टले बताए । यस्तै दुहुँ गाउँपालिकाको ५ दुल्लामा बाढीले मनुवा डडालको पनि मृत्यु भएको छ। कालागाड खोलामा बेलुकी १० बजेदेखि आएको बाढीले डडाललाई घरैसहित बगाएको हो ।
यो क्षेत्रमा पाँचवटा पसल, दुईवटा लघु जलविद्युत् आयोजना, चारवटा झोलुंगे पुल र एउटा पक्की पुल बगाएको प्रमुख जिल्ला अधिकारी सिद्ध राज जोशिले बताए । उनले भने, वडा नम्बर ३ निजाङगाडमा बाढीले दुई जना बेपत्ता छन् । निजाङगाड खोलाको बाढीले स्थानीय शेरसिंह कार्की र हरकसिंह कार्की वेपत्ता भएका छन् ।
दुहुँ ३ को श्रीबगडमा निजाङगाडले पूर्ण बहादुर बम, नरेन्द्र बहादुर बम, दिपक बम, रणबहादुर बम, धिरेन्द्र बम, शेरबहादुर बमको घर बगाएको छ । यस्तै महाकाली नगरपालिका १ को श्रीबगडमा देव बहादुर बम, अमरबहादुर बम, सुन्दर बहादुर बम र जित बहादुर बमको होटल तथा पसल बगाएको छ ।
अहिले घटनास्थलमा नेपाल प्रहरी, सशस्त्र प्रहरी, नेपाली सेना, रेडक्रस र स्थानीय पुगेका छन् । बाटोघाटो नहुदा उद्दार कार्यमा ढिला भएको महाकाली नगरपालिकाका नगर प्रमुख हन्श राज भट्टले बताए । उनले भने, अहिले यो क्षेत्रमा तुइन लगाएर भए पनि समान सार्न सुरक्षाकर्मी परिचालन गरिएको छ ।
प्रतिक्रिया दिनुहोस !
