काठमाडौँ: किर्तीपुर ट्यागंलाफाँटकी अभिभावक सर्मिला श्रेष्ठकी छोरी रविना श्रेष्ठ कक्षा ५ मा अध्ययनरत छिन् ।
विद्यालयबाट श्रेष्ठलाई अब केही दिनमै भौतिक उपस्थितिमा कक्षा सञ्चालन हुने भन्दै फोन आयो । उनले भनिन्, ‘अब केही दिनमै विद्यालय खोल्ने भनेर खबर गर्नुभएको छ । छोरी ५ कक्षामा पढ्छिन् । विद्यालय पठाउने कि नपठाउने अलमलमा परेको छु ।’
बल्खुमा बस्दैआएका दीपेन्द्र शीवाकोटीका छोरा कक्षा ३ मा पढ्छन् । अनलाइन कक्षा चलिरहेको छ । तर, अब छिट्टै स्कुल सञ्चालन हुने भनिएको छ । शीवाकोटी भने छोरालाई स्कुल पठाउन तयार छैनन् । ‘खोप पनि लगाउन पाएको छैन । यस्तो जोखिममा छोरालाई केही भयो भने जिम्मा कसले लिने ?’ शीवाकोटीले सोधे ।
निजी स्कुलहरुको छाता संगठन प्याव्सनका उपमहासचिव आर बी कटुवालले भने अब बिस्तारै स्कुलहरु भौतिक उपस्थितिमै सञ्चालन गरिने बताए । उनले भने, ‘सरकारले स्कुल खोल्ने या नखुल्ने भनेर स्थानीय तहलाई अधिकार दिएको छ । परिस्थिति हेरेर खुल्छन् । हामी जनस्वास्थ्यका मादपण्ड पालना गरेर शैक्षिक संस्था खोल्न तयार छौँ ।’
शिक्षाविद् प्रा.डा. विद्यानाथ कोइराला स्कुल सञ्चालन गराउने सन्दर्भमा समानान्तर विकल्प सहित अघि बढ्नुपर्ने बताउँछन् । उनले भने, ‘यदी कुनै विद्यार्थी विद्यालय आउन डराउँछ, अभिभावक पठाउन डराउँछ भने त्यसको समानान्तर विकल्प खोजिनुपर्छ । केटाकेटीले त मास्क लगाउन मान्दैन नी । अभिभावक र विद्यार्थी नै डराएपछि के गर्ने ?’
स्वास्थ्य मन्त्रालयका प्रवक्ता डा. कृष्ण पौडेल कोरोना संक्रमण जोखिम अझै नटरेको बताउँछन् । ‘संक्रमणको जोखिम कायमै छ । मास्कको समुचित प्रयोग, भौतिक दूरी कायम र व्यक्तिगत सरसफाईलाई विशेष ध्यान दिनुपर्छ’ डा पौडेलले अन्नपूर्णसँग भने ।
स्वास्थ्य तथा जनसंख्या मन्त्रालयका अनुसार हालसम्म १५ प्रतिशत नागरिकले पूर्ण खोप लगाएका छन् । नेपालमा बालबालिकाहरुका लागि खोप उपयोगमा आएको छैन । सरकारले बालबालिकालाई मध्यनजर गर्दै फाइजर खोप ल्याउने बताए पनि कहिलेसम्म आइपुग्छ यकिन छैन ।
विज्ञहरुका अनुसार कोरोना संक्रमणबाट जोगिने उत्तम उपाय भनेकै भौतिक दूरी कायम, मास्कको समुचित प्रयोग र पूर्ण खोप हो । स्वास्थ्य मन्त्रालयले संक्रमण जोखिम अझै नटरेकाले स्वास्थ्य मापदण्ड पूर्ण रुपमा पालना गर्न सचेत गराउँदैआएको छ ।
तर, प्रशासनले अनुमति दिएलगत्तै राजधानी काठमाडौँ लगायत देशभरका अधिकांश स्कुलहरु भौतिक उपस्थिति सहित खुल्न थालिसकेका छन् । यसका लागि सरकारले जारी गरेको स्मार्ट लकडाउन सम्बन्धी कार्यविधि २०७८ ले स्कुल खोल्ने आधार तय गरिसकेको छ ।
जसमा स्वास्थ्य सुरक्षा मापदण्ड पालना गर्दै परीक्षा सञ्चालन तथा सम्बन्धित कक्षाको कुल क्षमताको ३३ प्रतिशत नबढ्ने गरी आलोपालो समेतको उपयुक्त वैकल्पिक विधि अपनाई भौतिक उपस्थितिमा कक्षा सञ्चालन गर्न सकिने भनिएको छ । त्यसका लागि स्थानीय तहको सिसफारिसमा जिल्ला कोभिड १९ व्यवस्थापन समितिले स्वीकृति दिनसक्ने कार्यविधिमा उल्लेख छ ।
काठमाडौँ महानगरपालिकाले महानगरभित्रका विद्यालय यसै हप्तादेखि खोल्ने तयारी थालेको छ । स्मार्ट-लकडाउन कार्यविधि अनुसार काठमाडौँ जिल्ला कोभिड-१९ संकट व्यवस्थापन केन्द्र (डीसीएमसी) ले विद्यालय खोल्न सक्ने स्वीकृति दिएपछि महानगरले विद्यालय खोल्ने तयारी थालेको हो ।
जिल्ला प्रशासन कार्यालय काठमाडौँले शैक्षिक संस्थाहरुमा पठनपाठन गर्नैपर्ने भए सरकारले जारी गरेको स्मार्ट लकडाउनको प्रावधानभित्र रही स्थानीय तहहरुले डिसीएमसीसँग समन्वय गरी स्कुल सञ्चालनको निर्णय गर्नसक्ने जनाएको थियो ।
कोभिड-१९ को दोस्रो लहरसँगै गत बैशाख १६ गतेदेखि नेपाल सरकारले दोस्रोपटक लकडाउन गर्दा देशका सम्पूर्ण स्कुल बन्द गरिएका थिए । विश्व स्वास्थ्य संगठन (डब्लूएचओ) ले विद्यालय ल्याउने र घर पुर्याउने जस्ता बेलामा जोखिममा भएका बालबालिकाप्रति विशेष ध्यान दिनुपर्ने बताएको छ । विद्यालय परिसर र कक्षाकोठामा व्यक्ति-व्यक्तिबीच कम्तीमा १ मिटर दूरी कायम गर्नुपर्ने डब्लूएचओको मापदण्डमा उल्लेख छ ।
प्रतिक्रिया दिनुहोस !
