ढल्केवर : धनुषामा एक पोखरीमा आमा-छोराको शव फेला परेको छ। धनुषाधाम नगरपालिका-२ धर्मपुरकी अन्दाजी २८ वर्षिया अर्चना सिंह र उनका ४ वर्षिय छोरा कुश कुमार सिंहको शव पोखरीमा भेटिएको इलाका प्रहरी कार्यालय धनुषाधामका प्रहरी निरिक्षक सुरेश ठाकुरले जानकारी दिए।
सोमबार विहान स्थानीयले पोखरीमा तैरिरहेको अवस्थामा शव देखेपछि प्रहरीलाई खबर गरेको थियो। घटनाबारे जानकारी पाएलगत्तै इलाका प्रहरी कार्यालय धनुषाधामको प्रहरी टोलीले पोखरीबाट शव निकालेका थिए।
मृतक आमा-छोराको शव पोस्टमार्टमको लागि प्रादेशिक अस्पताल जनकपुर पठाइएको प्रहरी निरिक्षक ठाकुरले जनाए। स्थानीयको भनाइलाई उदृत गर्दै प्रनि ठाकुरले मृत महिला अलिक सुस्त मनस्थितीको रहेको बुझिएको बताए।
‘घटनाको प्रकृति हेर्दा शंकास्पद जस्तो छैन। अहिले ठ्याक्कै यस्तो हो भनेर भन्न मिल्दैन। हामी अनुसन्धान गर्दैछौं। बाँकी कुरा शवको पोस्टमार्टम पश्चात खुल्छ,’ प्रहरी निरिक्षक ठाकुरले भने।
प्रतिक्रिया दिनुहोस !
