मन्त्रीहरुलाई नेपालको निर्देशन: राजनीतिक नियुक्ति गर्दा जथाभावी नगर्नू
असोज २४, २०७८ आइतबार १६:४२:०
काठमाडौं : नेकपा (एकीकृत समाजवादी) का अध्यक्ष माधवकुमार नेपालले आफ्नो पार्टीबाट नवनियुक्त मन्त्रीलाई कडा निर्देशन दिएका छन् । उनले आफ्नो पार्टीबाट मन्त्री बनेकाहरुलाई १० वटा निर्देशन दिएका छन् । इमान्दारिता र कर्तव्यनिष्ठ भएर काम गर्नुका साथै देश, जनता र संस्थाप्रति प्रतिबद्ध हुन निर्देशन दिएका हुन्।
उनले राजनीतिक नियुक्ति गर्दा जथाभावी नगर्न पनि मन्त्रीहरुलाई निर्देशन दिएका छन् । उनले पार्टीको समन्वयमा सल्लाहकार, पिए नियुक्त गर्न सुझाए । स्वास्थ्य तथा जनसंख्यामन्त्री विरोध खतिवडाले नेपालको भनाइप्रति उद्धृत गर्दै भने, ‘ नियुक्तिमा जथाभावी नगर्ने,मन्त्रिपरिषदमा जाँदा एकमत भएर जाने, अनुशासनमा रहेर काम गर्न ,देश र जनताप्रति उत्तरादायी हुन निर्देशन दिनु भएको छ।’
नेपालले निजी स्वार्थ, अनियमितता र भ्रष्टाचारजन्य प्रवृत्तिहरूबाट मुक्त हुन पनि सचेत गराएका छन्। नेपालले कुनै पनि संस्थामा व्यक्तिको छनौट गर्दा व्यक्तिको योग्यता, क्षमता र कार्यसम्पादनमा गरेको उत्कृष्टताको आधारमा जिम्मेवारी दिन आग्रह गरे । ‘आफू खुसी होइन,योग्यता क्षमता, र कार्यसम्पादनमा उत्कृष्टताको आधारमा व्यक्ति छनौट गर्नु होला,' उनले भने ।
अध्यक्ष नेपालले मन्त्रीहरूबाट विवादमा आउने र बदनामी कमाउने कुनैपनि काम नगर्न सुझाए । नेपालले भने, ‘बदनामी कमाउने र विवादमा पर्ने कुनैपनि कामहरू तपाईंहरूबाट हुने छैनन् भन्ने कुराको हामीले आशा र अपेक्षा गरेका छौँ ।’ यस्तै नेता नेपालले असल आचरण कायम गर्न समेत निर्देशन दिएका छन्।
'मन्त्रीहरू रक्सी खाएर मात्तिए, बेलुकाबेलुका फाइभस्टार होटलमा गएर रक्सी खाइरहेका छन् र आफ्नो क्लाइन्टहरू सँग बसेर यिनै कुरा गरिरहेका छन् भन्नेकुरा सुन्नु नपरोस्,पहिला चार पेग अहिले १० पेग को खान नथाल्नु होला। सिधा कुरा, रक्सी खाने बानी छ भने पनि बानी त्याग्नुस् । अरु आचरण, महिलासँग जोडिएका त्यस्ता कुनै कुराहरू सुन्नु नपरोस् । त्यस्ता व्यवहारहरू तपाईंहरूबाट नहोस् । यस कुरामा म जोड दिन चाहान्छु,'उनले भने ।
अध्यक्ष नेपालले मन्त्रिपरिषद् बैठकमा आउने विभिन्न विषयवस्तुहरूमाथि अगाडि नै सामूहिकरूपमा बसेर, छलफल गरेर मात्र गर्न उनले आग्रह गरे । विज्ञहरुसँग परामर्श गरेर कार्यसम्पादन गर्न उनले निर्देशन दिए।
उनले स्वार्थ केन्द्रित अनुचित कामको सर्तमा राखेर आउनेहरुप्रति सचेत हुन पनि सम्झाए । उनले पहिला मन्त्री बनिसकेकाको अनुभव लिएर काम गर्न आग्रह गरे। नेकपा एसबाट स्वास्थमन्त्री खतिवडा, शहरी विकासमन्त्री रामकुमार झाक्री, संस्कति पर्यटन तथा नागरिक उड्डयमन्त्री प्रेमबहादुर आले र श्रम, रोजगार तथा सामाजिक सुरक्षामन्त्री कृष्णकुमार श्रेष्ठ मन्त्री बनेका छन्। आलेबाहेक तीनैजना पहिलोपटक मन्त्री बनेका हुन् ।
प्रतिक्रिया दिनुहोस !
