बाढीप्रहिरो प्रभावितका लागि सरकारले विशेष प्याकेज ल्याउँछ: प्रधानमन्त्री देउवा
कात्तिक ७, २०७८ आइतबार १५:०:०
फिदिम : प्रधानमन्त्री शेरबहादुर देउवाले बाढीपहिरो प्रभावितका लागि सरकारले विशेष कार्यक्रम ल्याउने बताएका छन् । पाँचथर र इलामको बाढीप्रहिरो प्रभावित क्षेत्रको निरीक्षणपछि पाँचथरको फाल्गुनन्द गाँउपालिका ३ स्थित जलसिंह माध्यमिक विद्यालयमा आयोजित कार्यक्रममा पीडितई सम्बोधन गर्दै देउवाले यस्तो बताएका हुन् ।
प्रदेश नम्बर एकमा सबैभन्दा धेरै क्षति पाँचथरमा भएको भन्दै देउवाले तत्काल मन्त्रिपरिषद्को बैठक बसेर पीडितहरुको दीर्घकालिन व्यवस्थापनका लागि विषेशष कार्यक्रम ल्याउने बताएका हुन् । ‘सरकारले यसअघि नै आपतकालिन राहतका कार्यक्रमहरु ल्याएको छ,' पीडितहरुलाई सम्बोधन गर्दै देउवाले भने,'त्यो आपतकालिन कार्यक्रम हो । अब सरकारले पीडितहरुको उचित व्यवस्थापनका लागि दीर्घकालिन कार्यक्रम ल्याउँछ।’
पाँचथरमा बाढिपहिरोबाट मृत्यु हनेको संख्या ३० पुगेको छ । देउवाले मोरङ, सुनसारीहुँदै पाँचथर र इलामको पहिरो प्रभावित क्षेत्रको हेलिकोप्टरबाट निरीक्षण गरेका हुन् । इलामको फाकफोकथुम, माङ्सेबुङ, चुलाचुली गाउँपालिकासहित पाँचथरको मिक्लाजुङ र फाल्गुनन्द गाँउपालिकाको निरीक्षण गरेका हुन् ।
मिक्लाजुङ गाउँपालिकाको चिसापानीमा केही समय देउवाले पहिरो पीडितहरुको गुनासो सुनेका थिए। चिसापानीबाट हेलिकोप्टरबाट फाल्गुनन्द ३ मा अवतरण गरेका देउवाले पीडितहरुलाई सम्बोधन गरेका हुन् ।
उक्त कार्यक्रममा पाँचथर र इलामका प्रमुख जिल्ला अधिकारीले दुई जिल्लाको पहिरो प्रभावितको रिपोर्ट प्रधानमन्त्री देउवालाई बुझाएका थिए । निरीक्षणका लागि देउवासँग सूचना, सञ्चार तथा प्रविधिमन्त्री ज्ञानेन्द्रबहादुर कार्की, उर्जा जलस्रोत तथा सिंचाइमन्त्री पम्फा भुसाल र स्वास्थ्य तथा जनसंख्या राज्यमन्त्री भवानीप्रसाद खापुङ पनि सहभागी छन्।
प्रतिक्रिया दिनुहोस !
