ढल्केवर(धनुषा) : धनुषामा दुर्घटना भएलगत्तै बसमा आगलागी भएको छ। दाङबाट बिराटनगरतर्फ जाँदै गरेको बस पूर्वपश्चिम राजमार्गअन्तर्गत धनुषाको धनुषाधाम नगरपालिका–६ मालटोलस्थित दुर्घटना हुँदा बसमा आफै आगलागी भएको प्रहरीले जनाएको छ । दुर्घटनामा १२ जना यात्रु घाइते भएको प्रहरी निरीक्षक सुवेदीले जनाए। घाइते हुनेमा ७ जना महिला, चार पुरुष र एक बालक रहेको उनले बताए। उनीहरुको नाम, वतन खुल्न नसकेको बताइएको छ।
बुधबार बिहान करिब ८ बजेतिर ना ६ ख ७१०२ नम्बरको बस अनियन्त्रित भइ सडकबाट खस्दा दुर्घटना भएको इलाका प्रहरी कार्यालय ढल्केवरका प्रहरी निरीक्षक प्रदीप सुवेदीले जानकारी दिए ।
उनका अनुसार दुर्घटनालगत्तै बसमा आगलागी हुँदा पुरै भाग जलेर नष्ट भएको छ । प्रहरी निरीक्षक सुवेदीका अनुसार घाइते मध्ये १० जनाको स्थानीय स्वास्थ्य उपचार केन्द्रमा र दुई जनाको लालगढस्थित मोडेल अस्पतालमा उपचार भइरहेको छ । बसमा सवार अन्य यात्रुहरु सकुशल रहेको प्रहरी निरीक्षक सुवेदीले बताए । आगजनीमा अधिकांश यात्रुको समान जलेर नष्ट भएको प्रहरीले जनाएको छ ।
‘सडकबाट तल खसेको बसमा आफै आगो लागेको हो। बस पल्टिने क्रममा तेल टंयाकी फुट्न गइ बसमा आगो लागेको हुनसक्ने प्रहरीको प्रारम्भिक अनुमान छ,' प्रहरी निरीक्षक सुवेदीले भने । समा लागेको आगो ढल्केवरस्थित दंगा नियन्त्रण गणका सशस्त्र प्रहरी र इलाका प्रहरी कार्यालय ढल्केवरले बरुण यन्त्रको सहयोगमा नियन्त्रण लिइएको छ।
प्रतिक्रिया दिनुहोस !
