बन्द गराउँदै हिँडेका विप्लवका ११ कार्यकर्ता पक्राउ
![बन्द गराउँदै हिँडेका विप्लवका ११ कार्यकर्ता पक्राउ](https://annapurnapost.prixacdn.net/media/albums/biplab-arrest_20211116062913_fXFWazlkoy.jpg)
चितवन : नेत्रविक्रम चन्द ‘विप्लव’ नेतृत्वको नेकपाका ११ जना कार्यकर्ता चितवनमा पक्राउ परेका छन् । बन्द गराउँदै हिँड्ने क्रममा उनीहरुलाई प्रहरीले भरतपुर र नारायणगढबाट पक्राउ गरेको हो ।
पार्टीका जिल्ला अध्यक्ष सन्देश पौडेलसहितका नेता कार्यकर्ता पक्राउ परेका हुन् । वाइपास रोडमा टायर जलाउँदै गरेका दुईजना बिहानै नियन्त्रणमा लिएको हो । बाँकी नौजना नारायणगढको लायन्सचोकबाट पक्राउ गरिएको चितवन प्रहरी प्रवक्ता सूर्य थापाले बताए । उनका अनुसार जबरजस्ती बन्द गराउँदै हिँडेपछि उनीहरुलाई पक्राउ गरिएको हो ।
पेट्रोलियम पदार्थमा भएको मूल्यवृद्धि फिर्ताको माग गर्दै ‘विप्लव’ नेतृत्वको नेकपाले नेपाल बन्दको आह्वान गरेको थियो । बन्दले चितवनको जनजीवन प्रभावित भएको छ । निजी साना गाडी, मोटरसाइकल र अत्यावश्यक सेवा बाहेकका अन्य सवारी साधन संचालन हुन सकेको छैन।
अस्पतालमा समेत बिरामीको खासै चाप छैन। मुख्य बजारका पसल प्राय बन्द छन् । लामो दूरीका साधन पूर्णरुपमा ठप्प छन्।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)