राजविराज : श्रीमती हत्याका आरोपित सप्तरीको बोदे बरसाइन नगरपालिका–५ जाँजरका २५ वर्षीय लुकमान मियाँ पक्राउ परेका छन् । श्रीमतीको हत्याको आरोपमा लुकमानलाई पक्राउ गरी आइतबार म्याद थप गरिएको इलाका प्रहरी कार्यालय कडरबोना, सप्तरीका इन्स्पेक्टर बिरेन्द्रकुमार पासवानले बताए ।
रोशन खातुनको २०७६ मङ्सिर ३० गते लुकमानसँग विवाह भएको थियो । विवाहपछि दाइजो माग्दै पटक–पटक धम्की दिँदै आएका लुकमानसहितकाले दाइजो नदिएको रिसमा कुटपिट गर्दै ०७६ फागुन १ गते विष खुवाइ मारेको मृतकका भाइ मो. फिरोजले बताए ।
विष खुवाइएपछि गम्भीर बनेकी रोशनको उपचारको क्रममा ०७६ फागुन २ गते विराटनगरस्थित गोल्डेन अस्पतालमा मृत्यु भएको थियो। शवको पोस्टमार्टम २०७६ फागुन २ गते कोशी अस्पताल, विराटनगरमा भएको थियो ।
घटनासँगै मृतकका बुवा जहिरुद्दिनले इलाका प्रहरी कार्यालय कडरबोनामा दिएको जाहेरी दर्ता नभएपछि उच्च अदालत जनकपुर, राजविराज इजलासमा परमादेशका लागि मुद्दा दायर भएको थियो । राजविराज इजलाशले २०७७ मङ्सिर २९ गते परमादेश गरेपछि जाहेरी दर्ता गरी लुकमानलाई गिरफ्तार गरिएको इन्स्पेक्टर पासवानले बताए ।
हत्या आरोपमा लुकमानसहित लुकमानकी आमा ४५ वर्षीया सकिना खातुन, बुवा ४७ वर्षीय सरिमुल्ला मियाँ, ठूलोवुवा ५५ वर्षीय कलिमुल्ला मियाँ, महादेवा गाउँपालिका–४ का ३२ वर्षीय भिनाजु हजरत मियाँ र दिदी २७ वर्षीया हमिदा खातुन र लुकमानकी ठूलो दिदीकी छोरी २९ वर्षीया रेशमा खातुनविरुद्ध जाहेरी दर्ता भएको प्रहरीले जनाएको छ । अन्य आरोपितहरु पक्राउ परेका छैनन् ।
प्रतिक्रिया दिनुहोस !
