कांग्रेस क्षेत्रीय अधिवेशन : कति मतले हारे अमरेशकुमार सिंह ?
मंसिर २२, २०७८ बुधबार ११:४३:०
मलंगवा : कांग्रेसको १४ औं महाधिवेशनअन्तर्गत सर्लाहीको क्षेत्र–४ को क्षेत्रीय अधिवेशनमा संघीय सांसद डा. अमरेशकुमार सिंह पराजित भएका छन् । बुधबार बिहान सम्पन्न मतगणनामा महाधिवेशन प्रतिनिधिका उम्मेदवार रहेका सिंहको प्यानल नै पराजित भएको हो ।
गोडैता नगरपालिकास्थित रामवनमा भएको मतदानमा सिंहले २ सय ४८ मत प्राप्त गरेका छन् भने प्रदेश सरकारका मन्त्रीसमेत रहेका वीरेन्द्रप्रसाद सिंह ५ सय १४ मत ल्याएर महाधिवेशन प्रतिनिधिमा विजयी भएका छन् । संघीय सांसद कोइराला पक्षमा देखिएका छन् भने प्रदेश मन्त्री सिंह संस्थापन पक्षमा देखिएका छन् ।
क्षेत्रीय सभापतिमा धनकौल गाउँपालिकाको अध्यक्ष समेत रहेका संस्थापन पक्षका रामआश्रय साह ५ सय १६ मत ल्याएर बिजयी भएका छन् । उनका प्रतिस्पर्धी इतर समूहका हरेन्द्र सहनीले २ सय २७ मत मात्रै प्राप्त गरेका छन् ।
क्षेत्र नं. १ को ईश्वरपुरस्थित बयलवासमा मतगणना चलिरहेको छ। बुधबार बिहान सम्मको मतगणनामा दुवै पक्षको मिश्रित नतिजा आइरहेको छ। बिहान सम्म १ सय ५० मत मात्र गणना भएको छ। क्षेत्र नं. ३ मा मङ्गलबार राति अबेरसम्म उम्मेदवारहरुको मनोनयन दर्ता भएको थियो । बरहथवामा जारी सो क्षेत्रको अधिवेशनमा बुधबार मतदानको तयारी छ ।
क्षेत्र नं. २ मा भने विवाद छ । यस क्षेत्रमा तीनवटा वडाको वडा अधिवेशनको विषयलाई लिएर विवाद भएको कारण तोकिएको समयमा मतदान हुन नसकेको हो ।
प्रतिक्रिया दिनुहोस !
