बुटवल : नेकपा एमाले प्यूठानमा विजयविराज बिष्ट विजयी भएका छन् । सोमबार सम्पन्न मतगणना अनुुसार विष्टले प्रतिस्पर्धी नेहरसिँह केसीलाई १ सय ३८ मतले पछि पार्दै अध्यक्षमा विजयी भएका हुन् । विष्टले ३ सय १४ मत लिए भने केसीले १ सय ७६ मत लिए । बिष्ट एमाले प्यूठानमा कम उमेरमै नेतृत्व सम्हाल्ने नेतामा पर्छन् । प्यूठान नगरपालिका—३ दाखाक्वाडी निवासी विष्ट यस अघि अखिलमा लामो समय काम गरेका थिए ।
एमाले जिल्ला कमिटीको उपाध्यक्षमा झगबहादुर विश्वकर्मा विजयी भएका छन् । उनले २ सय ९५ र प्रतिस्पर्धी मूक्ती पोखरेलले १ सय ७९ मत लिए । विश्वकर्मा सरुमारानी गाउँपालिका अध्यक्ष समेत हुन् । सचिवमा नेगनसिँह कँवरलाई पछि पार्दै माधव पौडेल विजयी भए । पौडेलले २ सय ७२ र कँवरले १ सय ८६ मत लिए ।
उपसचिवमा माण्डवी गाउँपालिका अध्यक्षसमेत रोका श्रीधर रोकामगरले ३ सय ७२ र पत्रकारिता पृष्ठभूमीबाट आएकी दिपा घर्तीले ३ सय ८४ मत लिएर विजयी भए । दलित खुल्ला सदस्यमा राजेन्द्र गौतमले २ सय ७९ र पूर्ख सिँह सुनारले १ सय ७६ मत लिएर विजयी भएका छन् । आइतवार भएको मतदानमा ५ सय १० जनाले मतदान गरेका थिए । ९५ प्रतिशत मत खसेको थियो ।
प्रतिक्रिया दिनुहोस !
