प्यूठान जन्ती सवार जीप दुर्घटना : बेहुली गम्भीर, बेहुला सामान्य घाइते
माघ २२, २०७८ शनिबार ९:५२:०
प्यूठान : मध्यराती जन्ती सवार जीप दुर्घटनामा परी घाइते भएका मध्ये चार जनाको अवस्था गम्भीर रहेको प्रहरीले जनाएको छ। घाइतेमध्ये बेहुली नौबहिनी ६ किमिचौर निवासी २० वर्षीया रिमा जि.सीको अवस्था गम्भीर छ भने बेहुला लिवाङका २५ वर्षीय दानबहादुर खड्काको अवस्था सामान्य रहेको प्यूठानका प्रहरी प्रवक्ता प्रहरी निरीक्षक देवीप्रसाद गैरेले जानकारी दिए।
शनिबार राती १ बजे नौवहिनी गाउँपालिका ६ लुङबाट दुलही लिएर गौमुखी गाउँपालिका ६ ओखरपाटामा आउँदै गरेको जीप दुर्घटना भएको हो।
घाइतेमध्ये बेहुली नौबहिनी ६ किमिचौर निवासी २० वर्षीया रिमा जि.सी, सोही ठाउँकी २५ वर्षीय साबित्रा जि.सी, गौमुखी ६ लिवाङका १७ वर्षीय नरेश खड्का र २१ वर्षीय हरि बुढामगरको अवस्था गम्भीर छ। बेहुला लिवाङकै २५ वर्षीय दानबहादुर खड्काको अवस्था सामान्य रहेको प्रहरी प्रवक्ता गैरेले बताए।
गम्भीर घाइते मध्ये बेहुली रिमा जिसी, नरेश खड्का र हरी बुढामगरलाई थप उपचारका लागि बुटवल रिफर गरिएको छ। अन्य दुई जनाको जिल्ला अस्पताल विजुवारमा उपचार भइरहेको छ। ग १ ज ५०९२ नम्बरको जीपमा १३ जना जन्ती सवार थिए। जीप सडकबाट करिव १ सय ५० मिटर तल खसेको प्रहरीले जनाएको छ। दुर्घटनामा परी आठ जनाको ज्यान गएको छ।
प्रतिक्रिया दिनुहोस !
