मुम्बई : अभिनेत्री आलिया भट्टको मुख्य भूमिका रहेको चलचित्र ‘गंगुबाई काठियावाडी’ले बक्स अफिसमा उत्कृष्ट सुरुवात गरेको छ। गत शुक्रबारदेखि प्रदर्शनमा आएको बलिउड चलचित्र ‘गंगुबाई काठियावाडी’ले बक्स अफिसमा उत्कृष्ट सुरुवात गरेको भारतीय सञ्चार माध्यमले जनाएका छन्।
‘गंगुबाई काठियावाडी’ले शुक्रबार १०.५० करोड भारु व्यापार गरेको थियो। बलिउड पण्डितहरूले शुक्रबार चलचित्रले ६ देखि ७ करोडको मात्रै व्यापार गर्ने अनुमान गरेका थिए। यस्तै चलचित्रले शनिबार बक्स अफिसमा १३.३२ करोडको व्यापार गरेको छ। दुई दिनमा चलचित्रले २३.८२ करोडको कमाइ गरेको छ। आइतबार रातिसम्म गरी यो चलचित्रले ४० करोड कमाइ गर्ने आशा निर्माण पक्षको छ। आइतबार भारतमा बिदा हुने भएकाले पनि चलचित्रले राम्रो कमाइ गर्ने अनुमान गरिएको छ।
सञ्जयलीला भन्सालीको निर्देशनमा बनेको यो चलचित्रमा आलिया भट्ट केन्द्रीय भूमिकामा छिन्। चलचित्रमा अजय देवगण, शान्तनु महेश्वरी, विजय राजलगायतका कलाकारको पनि मुख्य भूमिका छ। चलचित्रको कथावस्तुलाई दर्शकले मन पराएका छन्।
प्रतिक्रिया दिनुहोस !
