जनकपुरधाम : नेपालका लागि ब्रिटिश राजदूत निकोला पोलिट सोमबार जनकपुरधामस्थित नारी विकास केन्द्र पुगिन् । ग्रामिण परिवेशमा बनाइएको केन्द्रमा राजदूत पोलिटले स्थानीय महिला चित्रकारसँग करिब एक घण्टा चियोचर्चो गरिन् । महिलाको विकास र आत्मनिर्भरताका लागि मिथिला चित्रकलाको बजारिकरण, व्यवसायीकरण र व्यवस्थापन अपरिहार्य रहेको पोलिटले बताइन् । 'म मिथिला चित्रकलाको प्रचारप्रसारका लागि सक्दो चाँडै काम गर्नेछु,’ राजदूत पोलिटले चित्रकारहरुसँग कुरा राख्दै भनिन्, 'यस केन्द्र र यहाँ कार्यरत महिलालाई आत्मनिर्भर बनाउनका लागि हामी अग्रसर हुनैपर्छ ।'
राजदूत पोलिटसँगै केन्द्रमा अवलोकनका लागि पुगेकी जनकपुरधाम उपमहानगरपालिकाकी उपप्रमुख रिता झाले पछिल्लो समय मिथिला चित्रकलाको व्यापार फस्टाएको बताइन् । उनले जुन प्रकारले प्रदेश र स्थानीय सरकारले मिथिला चित्रकलाको लागि योजना ल्याउनुपर्ने थियो त्यो नल्याएको स्वीकार समेत गरिन् ।
त्यसैगरी जनकपुरधाम उद्योग वाणिज्य संघका अध्यक्ष जितेन्द्र महासेठले मिथिला चित्रकला विश्वमै परिचित भएपनि यसको व्यवसायीकरण तथा बजारिकरणका लागि पूर्वाधार निर्माण गरिनु अहिलेको प्रमुख आवश्यकता रहेकोमा जोड दिए ।
प्रतिक्रिया दिनुहोस !
