श्रीलंकामा एक दिनअघि अर्थमन्त्री बनेका अली साबरीले दिए राजीनामा
कोलम्बो : श्रीलंकामा एक दिनअघि अर्थमन्त्रीमा नियुक्त भएका अली साबरीले राजीनामा दिएका छन् । हालै श्रीलंकामा जारी आर्थिक संकट र सरकारविरुद्धको प्रदर्शनका कारण मन्त्रिपरिषद्को सम्पूर्ण सदस्यले राजीनामा दिएको थियो ।
त्यसपछि सोमबार नयाँ मन्त्रिपरिषद्ले सपथ ग्रहण गरेको थियो । अली साबरीलाई अर्थ मन्त्रालय दिइएको थियो। तर एकदिन पछि नै उनले राजीनामा दिएका छन् ।
उनले राष्ट्रपति गोताबाया राजापाक्षेलाई लेखेको पत्रमा लेखिएको छ, 'अहिलेको अवस्थालाई ध्यानमा राखी यथोचित विचार गरेपछि यो अभूतपूर्व संकटसँग जुध्न अझ राम्रो व्यवस्था आवश्यक रहेको मेरो धारणा छ । र यसमा नयाँ अर्थमन्त्रीको नियुक्ति पनि समावेश छ।'
यसै कारणले तत्काल पदबाट राजीनामा दिएको उनले पत्रमा लेखेका छन् । यसअघिको सरकारमा अली साबरी न्यायमन्त्री थिए । तर, अप्रिल ३ मा उनले बाँकी मन्त्रीसहित राजीनामा दिए ।
त्यसपछि सोमबार उनलाई अर्थ मन्त्रालयको जिम्मेवारी दिइएको थियो।
पत्रमा उनले राष्ट्रपति राजापाक्षेले राम्रो व्यक्तिलाई अर्थमन्त्री बनाउन चाहेमा आफ्नो संसदीय सिट पनि त्याग्न तयार रहेको लेखेका छन् । बीबीसी