नवलपरासी कांग्रेसमा उम्मेदवार सिफारिसमै विवाद
परासी : बैशाख ३० गते हुने आसन्न स्थानीय तह निर्वाचनका लागि नेपाली कांग्रेस पश्चिम नवलपरासीमा वडास्तरमै विवाद देखिएको छ । कांग्रेसले वडा समितिमार्फत उमेदवारको सिफारिसका लागि नाम छनौट सुरु गरेको छ । पहिलो चरणको नाम सिफारिसमै अधिकांश वडामा विवाद देखिएको हो । आंकाक्षी बढी देखिनु स्वभाविक भएपनि जिल्ला र क्षेत्रीय कार्य समितिले नाम सिफारिसबारे छुट्टाछुट्टै मापदण्ड तोकेर पत्र पठाएपछि विवाद देखिएको हो ।
वडाअध्यक्ष र सदस्यहरुको नाम चैत २१ गतेभित्र नगर र गाउँ कार्य समितिमा पठाउनुपर्ने उल्लेख छ । नगर र गाउँ समितिले २३ गतेभित्र प्रदेश क्षेत्रीय समिति र २५ गतेभित्र प्रतिनिधि सभा क्षेत्रीय कार्य समितिमा सिफारिसका लागि पठाउने भनिएको छ । तर, विवादका कारण वडा समितिले आजसम्म नगर/गाउँ समितिमै नामावली पठाउन सकेका छैनन् । कांग्रेसको विधानमा उमेदवारको नाम सिफारिस गर्दा एउटा पदमा बढीमा महिला अनिवार्यसहित ३ जनाको नाम सिफारिस गर्नुपर्ने प्रावधान छ ।
तर, एक पदमा ५ देखि ८ जना बढी उम्मेदवार आंकाक्षी देखिएका छन् । उमेदवारका लागि अहिले पनि नेपाली कांग्रेसबाट निर्वाचित जनप्रतिनिधिहरुले पुन: दोहरिने गरी सिफारिसका लागि नाम आएका छन् । अधिकांश नयाँ अनुहारका पनि रहेको वडा सभापतिहरुले बताएका छन् ।
जिल्ला समितिले पठाएको पत्रमा वडाका उमेदवारसँगै नगर र गाउँपालकाका प्रमुख र उपप्रमुखको नामसमेत समावेश गरेर पठाउन निर्देशन गरेको छ भने प्रतिनिधि सभा क्षेत्रीय कार्य समिति क्षेत्र नं. २ ले जिल्ला समितिको पत्रलाई खण्डन हुने गरी वडाका उमेदवारबाहेक प्रमुख/उपप्रमुख नपठाउन निर्देशन गरेको छ ।
जिल्ला समितिले पठाएको पत्रबारे जिल्ला सचिव कुलदिप आचार्यले नाम टुंगाउन सहज हुने भएकाले वडाबाटै रायसहितको प्रमुख र उपप्रमुखको नामावली पठाउन भनिएको बताए । प्रतिनिधिसभा क्षेत्रीय कार्य समितिको पत्रबारे क्षेत्रीय सभापति माधवप्रसाद पाण्डेले विधानमा प्रमुख/उपप्रमुखको नाम पठाउन नभनिएकाले वडाअध्यक्ष र सदस्यको नाम मात्र सिफारिस गर्न भनिएको बताए ।
'केन्द्रको एउटा निर्देशन छ । अहिले फेरि जिल्ला र क्षेत्रीय समितिले छुट्टाछुट्टै पत्र पठाएका छन् । यसले वडा स्तरमा विवाद देखिएको छ । सुस्ता गाउँ समितिका अध्यक्ष रविन्द्र जयसवालले अध्यक्ष र उपाध्यक्षको नाम पठाउने/नपठाउने विवादका कारण अझ पनि केही वडाको सिफारिस नआएको बताए ।
विधानमा वडा समितिलाई प्रमुख र उपप्रमुखको नाम सिफारिस गर्न अनिवार्य गरिएको छैन । जिल्ला समितिले पठाएको पत्रबारे जिल्ला सचिव कुलदिप आचार्यले नाम टुंगाउन सहज हुने भएकाले वडाबाटै रायसहितको प्रमुख र उपप्रमुखको नामावली पठाउन भनिएको बताए । प्रतिनिधिसभा क्षेत्रीय कार्य समितिको पत्रबारे क्षेत्रीय सभापति माधवप्रसाद पाण्डेले विधानमा प्रमुख/उपप्रमुखको नाम पठाउन नभनिएकाले वडाअध्यक्ष र सदस्यको नाम मात्र सिफारिस गर्न भनिएको बताए ।
वडाको उमेदवार घोषणा प्रतिनिधि सभा क्षेत्रीय कार्य समितिले गर्छ । गाउँपालिका अध्यक्ष र उपाध्यक्ष पदको उमेदवार घोषणा जिल्ला कार्य समितिले गर्ने विधानमा उल्लेख छ । त्यस्तै नगरपालिका र उपमहानगरपालिका प्रमुख र उपप्रमुख उमेदवार घोषणा प्रदेशले र महानगरपालिकाको प्रमुख र उपप्रमुखको उमेदवार घोषणा केन्द्रले गर्ने विधानमा उल्लेख छ ।
यता मंगलबार मात्र केन्द्रीय समितिले जिल्ला समितिहरुलाई निर्देशन दिँदै उमेदवारको नाम सिफारिस गरेपनि घोषणा नगर्न परिपत्र गरेको छ । यो परिपत्रले स्थानीय चुनावी परिस्थिति र मातहतको अधिकारमाथि हस्तक्षेप हुन सक्नेमा कार्यकर्ताहरुले आंशका गर्न थालेका छन् ।