झिमरुकमा फुट्यो गठबन्धन, माओवादीलाई अध्यक्ष, कांग्रेसलाई उपाध्यक्ष
वैशाख ५, २०७९ सोमबार १३:२०:०
झिमरुक (प्यूठान) : झिमरुक गाउँपालिका प्यूठानमा सत्तारुढ दलको गठबन्धन फुटेको छ । तीन दल नेकपा माओवादी, नेपाली कांग्रेस र राष्ट्रिय जनमोर्चाको सत्ता गठबन्धन गर्ने केन्द्रले निर्णय गरेपनि उनीहरुबीच सहमति हुन सकेन । माओवादी केन्द्र र नेपाली कांग्रेसले नेकपा मसाल र त्यसको चुनावी मोर्चा राजमो बाहेकको गठबन्धन गरेका छन् ।
पद बाडफाँडसहित सहमति भएको सोमबार जारी विज्ञप्तिमा उल्लेख छ । नेपाली कांग्रेस झिमरुक गाउँपालिका पार्टी सभापति मिनराज भट्टराई र नेकपा माओवादी केन्द्रका झिमरुक अध्यक्ष झकबहादुर जिसीले संयुक्त रुपमा विज्ञप्ति जारी गरी वडा तहमै भागबण्डा गरी गठबन्धन गरिएको जनाएका छन् ।
गाउँपालिका अध्यक्ष माओवादी केन्द्रलाई र उपाध्यक्ष नेपाली कांग्रेसलाई दिने सहमति भएको छ । मसालसहितको गठबन्धन गर्ने लामो छलफल भएपनि तीन दलबीच सहमति जुट्न नसक्दा दुई पार्टीको मात्र गठबन्धन भएको उनीहरुले बताएका छन् ।
सहमतिअनुसार वडामा जुन दलको वडा अध्यक्ष उम्मेदवार हुन्छ त्यही दलकै चुनाव चिन्ह लिएर निर्वाचनमा जाने सहमति दुई दलबीच भएको छ । हाल झिमरुक गाउँपालिकामा नेकपा मसालको सत्ता छ । झिमरुक गाउँपालिकाको प्रत्यक्ष निर्वाचनमा नेकपा माओवादी केन्द्र दोस्रो र नेपाली कांग्रेस चौथो शक्ति हो । एमाले तेस्रो शक्ति हो ।
प्रतिक्रिया दिनुहोस !
